Aizawl-a phochhuah turin Serthlum vailiam a ni

Serchhip District chhung East Lungdar atanga Serthlum tharchhuah te chu Aizawl-ah zawrh turin nimin zing khan Serchhip atangin District Bawrhsap Nazuk Kumar IAS chuan a vailiam.
    Heng Serthlum thawnchhuah te hi Zotui Orange Producer Company Limited, E. Lungdar ten Central Scheme pakhat, Formation and Promotion of 10,000 FPO hnuaia CBBO Clover Organic Pvt. Limited te nena tangdun-a an tharchhuah niin Zotui Orange Producer te hian Serthlum hi Pick-up trip khat, pum 9500 chu an member te leh E. Lungdar leh a chhehvela kuthnathawktute tharchhuah lakkhawmin bul an tan a. Heng te hi Aizawl-a Road Show turin Bawrhsap Nazuk Kumar IAS hian Serchhip Sailiamkawn atangin a vailiam a, Zotui Orange Producer te hian hetiang hian hmalak zui zel an tum thu an sawi bawk a ni.

Serthlum vailiamna hun hi Serchhip DAO leh Formation and Promotion of 10,000 FPO-a Member Secretary Tlangtimawia Zote chuan kaihruaiin he hun hmanpuitu Bawrhsap Nazuk Kumar chuan Zotui Orange Producer ten hetiang an tihlawhtling thei chu lawmawm a tih thu sawiin, tharchhuaha duh tawk mai lova a hralhna lama hmalakna kalpui theih chu a hlu em em tih a sawi bakah nasa zawka hma la zel turin a ngen a. Serthlum-ah chauh ni lo, thlai dangah pawh hetiang zawnga hmalak zel hi a tul thu sawiin, a theih ang angin DC Office pawhin hma an lakpui zel dawn tih a sawi a ni.