Serchhip DIPRO in MJA te kumthar thingpui inpui

Information & Public Relation Department a Deputy Director leh Serchhip-a DIPRO K. Saitluanga chuan nimin khan MJA Serchhip District Member te kumthar thingpui inpui ah sawmin a pisa-ah inkawm hona hun an hmang.
He inkawmna ah hian Serchhip DIPRO chuan MJA memberte chu duhsakna nen kumthar chibai bukin, kum kalta zawng zawngah tha taka an thawhho tawhna ah lawmthu hrilhin, sawrkar hmalakna hrang hrangah te kumtluana tha taka thawhho puiah a sawm a. Chanchinbu miten hamthatna an dawn theih tur thilah pawh rualkhai taka kal tlan dial dial anih theih nana hmalak anih thin thu sawiin, I&PR Serchhip District Office-ah chanchinbu mite inti neitu taka awm turin a chah bawk.

He hunah hian MJA Serchhip District President C. Lalhminghlua pawhin DIPRO in duhsak taka leng tura a sawm avang leh thawhho puia a sawmnaah lawmthu a sawi a, MJA te leh I&PR Department ten thawhhona tha tak an neih avangin lawmthu a sawi bawk. Tunlai khawvelah Social Media in nasa taka min tuam mek laiin sawrkar leh mipuiin rintlaka an ngaih chu Chanchibu mite an nih thu pawh sawiin, tha lehzual zawk leh hmasawn tura hna thawk tura inbuatsaih a tul thu a sawi a, ram leh mipui tana rawng an bawlna anih thu a sawi bakah thulai la taka an din tlat a tul thu a sawi bawk. Thudik leh rintlak chauh tarlang thin tura infuihin, zau zawka hmalak theih nan inzir zel turin leh an hna zahawmna humhim zel turin a fuih bawk.

He hunah hian MJA Serchhip District a Member te pawhin an ngaih pawimawh zawng te sawiin, kumin atana hmalakna tura tha nia an hriat te pawh huamzau takin an sawiho bawk.