Lenkawl

Mizoram-a Chanchintha thlen ni, Missionary Day vawi 129-na chu nimin khan urhsun taka hman a ni a, Baptist Church of Mizoram (BCM) Kohhran chuan nilengin ruai nen he ni hi an lawm a ni.

Tuikum bialtu MLA leh Minister Er. Lalrinawma chuan a bial chhung Lungpho khaw ram Chalphai leilet hmun chu niminpiah khan tlawhin leilet neitute nena inkawmna neiin hmasawn zel dan tur an sawiho.

Serchhip Police te chuan nizan hmasa khan Heroin Hawng 10 (gram 112) zet manin hemi kaihhnawih ah hian mi pathum (3) manin thubuai siam sak an ni.

Sawrkar laipui ruahman angin National Food Security Act, 2013, Section 3 hnuaia beneficiary-te tan a thlawna buhfai sem tan a ni dawn.

Prime Minister Narendra Modi-a’n tun-hnaia a tlangzarh tak G20 Logo leh thupui ‘One Earth, One Family, One Future’ chu Mizoram sawrkar pisa zawng zawnga hmanga tarlang turin Mizoram sawrkar GAD chuan thuchhuah siamin a tarlang a. Mizoram sawrkar hnuaia Department zawng zawngte chu India in G20-a President a nih chhunga G20 logo leh thupui puanchhuah dan kawng dapchhuak turin a hriattir bawk an ni.

Indian Natonal Trust for Art and Cultural Heritage (INTACH) Mizoram Chapter Convener P. Rohmingthanga chu a boral tak avangin Co-Convener nilai Rin Sanga, IAS (Rtd.) chu Convener atan ruat a ni a, ani bakah hian C. Chawngkunga leh Prof. JV. Hluna te chu Co-Convener atan ruatin, Lalramthanga, IFS (Rtd.) chu Member Secretary leh Joint Secretary atan Rochamliana leh Treasurer atan Dr. Lalbiakmawia Ngente te ruat an ni bawk.

Nikum-a Aizawl Veng pakhat-a hmeichhe naupang pakhat pawngsual nia sawi chungchang ah pawikhawihtu nia rinhlelh te chu Lie Ditector hmanga thu zawhfiah an ni tawh a, Lie detector hmanga thuzawhfiahte hi pawikhawihna tawk naupang nu leh pa bakah a pi leh pu te an ni a, nikum December thla tir khan thu zawhfiah niin endikna Report pawhin Police hotute kut a thleng tawh a, amaherawh chu Technical thil deuh a nih avangin hotu sang zawkte nen zirchian leh phawt tur a nih avangin thil awm dan dik tak hriat theih a la ni rih lo thung.

Kumin March 10 atanga 12 chhunga Dar-lawn khua in Mizoram Kohhran Hmeichhe Inkhawmpui Lian a thlen tur atana inbuatsaihna atan nimin khan Pandal sak hna thawh tan a ni a, khawmpui neihna tur Pandal hi Darlawn Venghlun-a GSA Playground-ah sak niin a dung ft. 252 leh a vang ft. 165 a lian a sak tur niin mi 10,000 vel leng thei tura ruahman a ni a. Pandal sa hian khawchhunga Presbyterian Kohhran hrang hrangten chawl lovin hnatlangin an a in chhawkin an sa dawn a. Inkhawmpuina atan hian Organising Committee chuan Committee peng hrang hrang 14 din a ni.

P&E Minister R. Lalzirliana chuan Mizoram hmun 11-ah Nizung chakna hmanga kawlphe-tha siam tura hmalak a nih thu Zuangtui-a Shalom Industry hawnna a hmanpuina ah a sawi a. Tuikhuah hmanga kawlphetha siamna, Hydel Project chuan leilung, ramngaw leh nungcha te a tihchhiat nasat thin avangin nizung chakna hmanga kawlphetha siamchhuah kawngah sawrkar in hma a la tih P&E Minister chuan sawiin, Mizoram hmun 11-ah kawlphetha siamchhuak tur hian hmalak a nih thu leh hnathawktu tur pawh Tender hmanga zawn mek a nih thu a sawi bawk a ni.

Nikum (2022) chhung khan Mizoram-ah Dengue kai mi 1903 hmuhchhuah an ni.

Bangladesh Refugee Relief Committee (BRRC) chuan tun dinhmunah Mizoram-ah Bangladesh atanga inhumhimna zawnga rawn tlanlut mi 418 an awm mek tawh niin an sawi.

Niminpiah tlai lama Myanmar indo thlawhna te’n bomb hmanga Chin National Army (CNA) hmunpui ‘Camp Victoria’ an beihna ah mi 5 an thi.

Chakma Autonomous District Council (CADC)-a Caretaker mawhphurhna latu leh Lawngtlai Bawrhsap Amol Srivastava chuan tunkar Thawhtanni atanga nimin thleng khan CADC hmunpui Chawngte (Kamalanagar) tlawhin, Official-te nen inkawmna an neih bakah hmun pawimawh leh hna hrang hrang a enfiah a. NABARD sum cheng vbc. 8 senga sak mek CADC New Secretariat building bakah cheng vbc. 9 senga Kamalanagar (Chawngte) Rural Drinking Water Supply Project te tlawhin, Ekalavya Model Residential School (EMRS), Dulubonya, Kamalanagar-a building thar sak mek bakah zirna In dang te pawh a tlawh nghal bawk a ni.

Mizoram Rural Bank (MRB) chuan Internet kaltlanga Account khawih chetna tur Internet Banking Transaction rights facility an nei thar a, tunkar Thawhtanni khan a hawnna neih a ni.

Bangladesh ramchhung buaina avanga Zohnahthlak (Bawm) Mizoram lama sahimna zawnga rawn tlanlut te dinhmun chu nimin khan sawrkar aiawhin Minister ten enfiahin Parva-III an tlawh a, raltlante tan a rang thei anga ruahmanna siam zel a nih tur thu an sawi.

Tun thla ni 26-a India Republic Day lo thleng tur Serchhip-ah hman dan tur ngaihtuahin nimin khan Serchhip DC Meeting Hall-ah District District Bawrhsap Nazuk Kumar IAS hovin mi pawimawh te an thukhawm a. He huna an ruahman dan chuan Republic Day hi Serchhip Sports Stadium-ah January 26, 2023 zing dar 9:00-ah hman a ni anga, sawrkar ruahmanna angin District Bawrhsap Nazuk Kumar IAS chu khuallian a ni ang. He ni hlawhtling taka hmanna turin mawhphurhna hrang hrang insem a ni a, chhun lamah District Bawrhsap chenna Bungalow-ah ‘At Home Tea Party’ neih tur a ni bawk ang.

Ngentiang Branch YMA chuan nimin khan an Branch YMA Kumpuan ‘Khawtlang nun chawisan’ hawnna hun hmangin he hun hi bialtu MLA leh AH&Vety Minister Er. Lalrinawma chuan khuallian niin a hmanpui a ni.

Vawiin January 11, 2023 hi Mizoram-a Chanchintha thlenna ni champha, Missionary Day a ni a, sawrkar Pisa chawlh ah puan niin sawrkar Pisa leh zirna In te khar a ni ang. Baptist Church of Mizoram (BCM) chuan ‘Chanchin Tha hi hril rawh u’ (Marka 16:5) tih thupui ah hmangin he ni hi urhsun takin an hmang dawn a, Kohhran tam zawkin Ruai thehin Chanchin tha min pek avanga Pathian hnena lawmthu sawina Inkhawm leh Zaikhawm Programme duangin Serchhip-a BCM Kohhran te pawhin he ni hi urhsun takin an hmang ang.

Serchhip-a Sub-Divisional Education Officer (SEDO) leh Samagra Shiksha Serchhip District-a Addl. DPC Vanlalchhana chu Aizawl lama awm tura sawn a ni a. Serchhip DVO Office-a Veterinary Officer Dr. H. Vanlalrawna pawh kaisangin Aizawl-a awm tura sawn a ni bawk. Heng Officer pahnih te hi nimin khan an thawhna Office te chuan thlahna hun hmangin an aiawh tur dah an nih hriat a ni rih lo.

Mizoram Board of School Education (MB-SE) chuan kumin-a HSLC (pawl 10) leh HSSLC (pawl 12) exam hun tur tichhuakin High School Leaving Certificate (HSLC) Exam chu February 27, 2023-ah tanin March 15-ah Theory zawhfel a ni anga, March 16 atanga 22 thlengin Practical Exam neih zui a ni ang. Higher Secondary School Leaving Certificate (HSSLC) Exam pawh February 28, 2023-ah tan a ni dawn a, March 24-ah zawhfel a ni ve thung ang.