Bialtu MLA leh District Bawrhsap ten LFCS Serchhip Cultural Day an hmanpui

Serchhip-a Little Flower Convent School chuan nimin khan Serchhip Sports Stadium-ah ‘Cultural Day, 2023’ hmangin he hun hi Serchhip bialtu MLA Lalduhoma leh Serchhip District Bawrhsap Nazuk Kumar IAS te chuan an hmanpui a ni.

    LFCS Cultural Day-a khuallian bialtu MLA Lalduhoma chuan Mizoram-a School tha pawl Little Flower Convent School, Serchhip-ah ka bial chhungah kan nei chu lawmawm a tih thu leh Serchhip mipuite vanneihna a ni tih sawiin, chutihrual erawh chuan kan ram-a zirna erawh in duhthu a sam lo hle tih a sawi a. A bial chhunga Zirtirtu dah, tun thlenga School la hmu lo te pawh an awm thu leh Neihloh khua ah Zirtirtute chenna tur Quarters MLA Fund hmanga sak a nih thu te sawiin, hei vang hian zirna in hma a sawn theihna turin khaw thenkhat-a Zirtirtu post chu ‘Non-Transferable Post’ a siam a pawimawh thu a sawi a. Mizoram-ah Zirtirtu kan indaihloh thu leh kum 2020 khan Mizoram-a School leh College-a Zirtirtu Post ruak chu 2318 lai niin School building te pawh a tha tawk lo hle tih a sawi a. Kan ram-a Zirna a chhiat chhan chu eirukna (Corruption) vang anih thu sawiin, tuna zirlai naupang ni mek zawng zawngten tih tak zeta eirukna an do chuan kan ramin hmel thar duhawm zawk a la hmuh chhoh zel a beisei thu a sawi bawk.

He hunah hian Serchhip District Bawrhsap Nazuk Kumar IAS pawhin kum 1976 a din Little Flower Convent School chu Vawiin-ah chuan kan District a School tha ber te zinga mi a lo ni ta tih sawiin, kan ram leh Serchhip District tan a hlu em em tih a sawi a. Zirna chu Classroom leh lehkhabu-ah chauh a innghat thiang lo tih sawiin, “Kan naupangte hi nunkawng leh hriatna dang tam tak kan hlanchhawn a tul a ni. Chung kan hlanchhawn tur zinga pawimawh tak pakhat chu kan hnamziarang leh kan thu leh hla hluite an ni. Cultural Day hian chutiang lama hmasawnna nasa tak kan fateah a thlen dawn avangin a lawmawm hle a ni,” tiin Naupang zual deuhte zirtirna kawngah Playway method hman uar deuh deuh tul a tih thu a sawi bawk.

LFCS Cultural Day-ah hian Rev. Sister Florence Lalrinpuii’n hunserh hmangin, Sister Wilma, Headmistress in inlawmna thu a sawi a. Zirlai naupangten Costume Parade, Mizo infiamna chi hrang hrang, Tlanglam, Chai, Chawnglaizawn, Siktuithiang lam, Sarlamkai leh Cheraw te bakah Folk Song leh Drama te an entir a, zirlai nu leh pa te pawhin he hun hi an hmanpui bawk a ni.

Little Flower Convent School, Serchhip-ah hian Kindergarten atanga Class VIII thleng awmin kumin Academic Session-ah hian zirlai 942 leh zirtirtu 30 an awm mek a ni.