YMA leh Mizoram PWD thawhdunna tihtawp duh
Serchhip Sub-Hqrs. YMA huamchhunga Group YMA pakhat, Tuichangral South Group YMA chuan YMA leh Mizoram PWD in Memorandum of Understanding (MoU) an ziah chu tih tawp an duh tih an sawi.
Tuichangral South Group YMA hian Group YMA Conference neih loh kum-a neih thin Rorel Inkhawm chu nimin khan an nei a, he hun hi Khawlailung Branch YMA chuan thlengin Govt. P/S-IV ah Tui-changral Group YMA President J. Vanlalzawnga kaihhruaiin rorelna an nei a, thu ngaihtuah tura chhawpchhuah 7 zingah YMA leh Mizoram PWD ten Memorundum of Understanding (MoU) an lo ziah tawh chu awmzia neilo nia a lan avangin tihtawp an duh thu sawiin, hemi chungchang hi Sub-Hqrs. YMA Serchhip-a kal zel turin dah a ni.
Hei bakah hian an Group huamchhunga Chekawn - Artahkawn kawng chak zawka siam that a nih theih nan hmalak an rel bakah Dan lova kuhva tawlhruk in an Group a paltlang lohna turin hmalak an rel a. Boruak chhe zel tur venna atan Forest Department nena tangkawpin Tuichangral South Group YMA huam chhunga Branch YMA hrang hrang ten mahni Branch huamchhung theuhah thing phun uar zel tura hmalak ni rawh se an ti bawk.
Chawhnu lamah inkhawm neih zui niin he hun hi Group YMA Vice President V. Lalvuana chuan a kaihruai a, he hunah hian Sub-Hqrs. YMA Vice President Lalrammawia chuan YMA Kumpuan ‘Ram leh Hnam humhalh’ tih thupui hmangin thu a sawi bawk a ni. Tuichangral South Group YMA hi Serchhip Sub-Hqrs YMA hnuaia Group YMA pathum zinga pakhat niin March 14, 1971 khan a ding tan a, tunah hian Branch YMA 21 leh Joint YMA 2 awmin, Member mipa 5135 leh Hmeichhia 3891, an vaiin 9116 an awm mek a, tunah hian East Lungdar-ah Joint YMA din belh a ni leh dawn bawk a ni.