Lenkawl

Kumin October 21 atanga December 31, 2026 chhunga neih tur ‘Saturation Campaign on Financial Inclusion Schemes at Gram Panchayat Level’ hawnna chu nimin khan hmun hrang hrang ah neih a ni.

Sports and Youth Services Minister Lalnghinglova Hmar chuan Mizoram-a khualzin pung mek ah Taxi khalhtu ten mawhphurhna sang tak an neih thu a sawi.

Lawngtlai Bawrhsap Donny Lalruatsanga chuan nimin khan Thingkah-a District Institute of Education and Training (DIET) Lawngtlai tlawhin Principal Ngur Hming Liani Chinzah leh thawktute nen an inkawm a, DIET-a thawktute chu Lawngtlai District-in Zirna lama hmasawnna a neih theihna tura thawktu an nih angin Zirtirtu training pek, D.El.Ed Course, In-service Training leh a dangah te theihtawp chhuah chhunzawm zel turin a chah a. Zirtirtu hna chu hna ropui ber pakhat a ni tih sawiin, chumi tura zir mekten Zirtirtu tha tak ni tura tul leh pawimawhte hriatchian a pawimawh takzet tih a sawi a. Zirlaite chu thiamna tak tak nei tur leh hnathawk tlaka inzirchhuak tur te, min rintlak leh chhuanawm, ram leh hnam innghahna tlak ni tura bei fan fan turin a fuih bawk a ni.

Nursing School Lunglei chuan nimin khan 29th Batch Graduation leh 32nd Batch Lamp Lighting hun hmangin Lunglei Municipal Council (LMC) Chairman Lalzuithanga chuan khuallian niin a hmanpui a, Nurse hna chu rawngbawlna pawimawh tak a nih avangin mahni leh In chhung khur hmalam ngawt thlira zir chi a nih loh thu leh tuina leh thiamna tak tak nena thawh chi a nih thu sawiin, hmangaihna tak tak nena thawk thei turin nuam ti tak leh taima taka zir turin zirlaite a fuih bawk a ni. He hun hi Lunglei High Powered Committee (HPC) Vice Chairman V. Malsawm-tluanga MLA pawhin hmanpuiin Nursing School Lunglei-a zirlai tha bik te tana ama sum senga a ruahman sak, ‘V. Malsawmtluanga Award’ chu a tum khatna atan a hlan nghal a ni.