PMAAGY kalpuina turin Hualtu khua thlan a ni

Tun sawrkar kumthar atanga Central sawrkar Scheme thar Pradhan Mantri Adi Aadarsh Gram Yojana (PMAAGY) kalpuina tur atana thlan Hualtu khua chu nimin khan bialtu MLA leh Assembly Deputy Speaker Er. Lalrinawma chuan a tlawh.

Hualtu khawtlang hruaitute nena an inkawmhona ah Er. Lalrinawma chuan, Tuikum Bial khaw tam tak chu Pradhan Mantri Adi Aadarsh Gram Yojana (PMAAGY) kalpuina tur atana thlanchhuah zingah an awm dawn tih sawiin, Hualtu chu hmalak hmasakna tur khua zingah a tel tih a sawi a. Hualtu khaw mipuite a lawmpui thu sawiin, bialtu a nih angin a bial chhung khua te thlan an nihnaah sawrkar chungah a lawm hle tih a sawi bawk. Tuikum bialtu MLA chuan mipuiten he Scheme lo kal tur hi an tangkaipui a beisei thu sawiin, mahni zawn-a tihve tur awm ang angte pawh theihtawp chhuaha lo thawk ve thin turin a ngen a. Sawrkar atanga duhsakna leh indawmkanna tur an dawn leh an hmuh te chu tha takin, a nihna ang takin hmang thiam zel ila ram leh khawtlang tan a lo hlawk thin a ni, a ti a. Mizoram sawrkar flagship programme SEDP pawh an la hmuh chhoh zel dawn thu a sawi bawk.

Pradhan Mantri Adi Aadarsh Gram Yojana Yojana (PMAAGY) hi Sawrkar laipui a Ministry of Tribal Affairs in Thingtlang khua thlan bikte tana hmasawnna hnathawhna tur Scheme a duan a ni a. Sawrkar laipui hian Mizoram-ah he Scheme kalpui nan hian khua 344 a rawn thlang a, Hualtu hi khaw thlan zinga mi a ni. PMAAGY hi Sawrkar kum thar 2022-2023 atanga kalpui tan tum a ni a, Social Welfare & Tribal Affairs hnuaiah kalpui dawn a ni.