LENKAWL ADS (Computer zir duh tan 6) :

Mumbai-a zin Sports Minister Robert Romawia Royte chuan TATA Trusts hotute kawmin Mizoram-a infiamna hmasawnna tura TATA Trust te nena thawhhona leh hmalakna chungchang a sawipui.

Sports Minister hian Mumbai-a a thlenna Hotel JW Marriot-ah TATA Trusts CEO Srinath Narasimhan hi niminpiah tlai khan kawmin Tata Trusts te nena MoU an sign angin April thla atang hian Mizoram District 11 tuam kimin khaw 60-ah Football zirna kalpui tan a nih tur thu leh hemi atan hian Coach pawh lak an nih tawh thu a sawi a. Mizo naupangte tana Tata Trust puihnaa Badminton zirna siamthat leh siamthar dan tur chungchanga thil pawimawh dangte an sawi dun bawk a ni.

Sports Minister Robert Romawia Royte hian Mumbai Mizoram House-a Cancer veite leh anmahni awmpuitute chu zanriah a buatsaih sak bawk a, damlo leh damlo awmpuitu mi 30 laiin zanriah hi an kil a, Mumbai Mizoram House-a awmte chuan Minister hnenah hian an harsatna leh mamawhte an lo thlen a. Minister chuan a thian thate nen thawhkhawm in an mamawh zualpui phuhruk nan Rs 3,00,000/- a pe dawn a ni. Mumbai Mizoram House-a awmte chuan Robert-a’n Mumbai a tlawh apianga damlote puala zanriah a buatsaih thin chu lawmawm an tiin an mamawh leina tur sum fai a ngaihtuahsak dawn avanga an lawm thu an sawi bawk.