COVID-19 hri leng mek dinhmun ziaawm hretin inkaihhruaina pawh thlahdul hret a ni

Zonuna Kawlni (LENKAWL) • April 2, 2022 • Comments • Mizoram

Mizoram-a COVID-19 hri leng mek dinhmun chu State Disaster Management Authority chuan thlirin ziaawm lam a pan hret hret nia hriain inkaihhruaina pawh thlahdul hret a ni.

Hemi chungchanga sawrkar thuchhuah chuan India ramah pawh Covid-19 dinhmun a lo ziaawm zel bawk avangin eizawnna leh mihring nunphung nghawng nasa lo zawnga hmalak chhunzawm a nih theih nan Mizoram chhunga COVID-19 hri darh zel tur venna atana inkhuahkhirhna awm mek chu thlahdul hret tula hriat a nih avangin inkaihhruaina thar chu hman nghal tura tihchhuah a ni tih a tarlang a ni. He inkaihhruaina thar ah hian School leh Hostel te chu Academic Session thar, April ni 5, 2022 atangin hawn theih a ni a, Anganwadi leh Creche Centre te hawn theih ni bawkin Higher Education Institutions (Universities, Colleges, Technical & Professional Institutions)-a Final Semester zirlaite leh Department of HAMP, MZU hnuaia Ph.D course work zirlaite tan class leh hostel hawn phal a nih bakah Practical Subject Student (UG&PG) te tan practical class leh hostel te chu April ni 1, 2022 atangin hawn phal a ni bawk.

Kohhran Inkhawm pangngai chhun leh zanah neih phal niin zing inkhawm pawh phal a ni a, Chhun leh zan-ah inkhawmpui neih phal a ni bawk a, ruai erawh buatsaih loh ni thei se tih a ni thung a, Deputy Commissioner te thurawn ngaichang chungin, Kohhran te chu an veng/khua theuh a Covid- 19 hrileng dinhmun ngun taka thlithlai reng turin beisei an ni. Inneih inkhawm leh Mitthi vuina ah inchhung (indoor)-a leng zat chanve (50% seating capacity) aia tam lovin phal a ni a, a theih chin chinah ei leh in sem loh ni se tih a ni bawk. Sports inelna, Tournament, adt. (indoor & outdoor) te chu phal a ni a, Indoor bikah chuan entu mipuite chu infiamna hmun-a leng zat chanve aia tam lova punkhawm phal a ni.

Mizoram pumah tul lova pawn chhuah leh inlenpawh loh hram ni se tih inkaihhruaina thar ah hian tarlan a ni a, Deputy Commissioner ten tualchhung dinhmun leh a tul dan azira Covid-19 hrileng laka invenna tur inkaihhruaina ‘Operational Guideline for Containment and Surveillance Plan of Covid-19’ chhuah thin te chu uluk taka kenkawh a nih theih nan hma an la tur a ni a. LLTF/VLTF ten he Order-in inkhuahkhirhna a siam bak pelin anmahni thu in veng/khaw bil inkhuahkhirhna hranpa curfew/lockdown/Containment Area/ Restricted Area an puang tur a ni lo tih pawh tarlan a ni bawk.