Kalphung tha zawk nen eirukna kan do - Chief Minister
Nimin khan Aizawl Vanapa Hall-ah Chief Minister Lalduhoma hovin ‘Vigilange Awareness Week 2026’ chu hman a ni a, he hunah hian Chief Minister Lalduhoma chuan eiruk theihna laite siamtha a, a pawp laite thawmtha turin nasa taka hmalak a nih thu sawiin, “Aikal lak kan titawp a, sawrkar hnathawkten hun a vawn dik theih nan Bio-metric attendance System kan siam a. CBI hnenah General Consent kan pe a. Contract Agreement fel lo, aworkar chan chhe sa ran ang chi reng reng a awm kan phal tawh lova. Project kan Centralise-a, Project inthuah te, Project hman zui tlak loh tur thawh fo ang chi kha kan remti tawh lo. Right to Public Services Act hnuaia Service kan tipung a. Official-te biak that kher a ngai tawh lo. Huntiam neiin hna an thawk tawh zawk a ni. Mipuite an zualko zung zungna tur online ‘Mipui Aw’ kan nei bawk a. Zualkona lo lut kan chinfel nghal theih chi reng reng chu kan ching fel nghal zel,” a ti.
Chief Minister chuan Project Monitoring Committee dinin, mipui aiawhzo takin Member tur pawh an thlan thu a sawi a, “Kal dik lo thei lo turin kan siam a ni. Mizoram mipuiten khawiah pawh hna chhia in hmuh chuan rawn report zel ang che u,” a ti a. “Lok Ayukta kan tichak a, ACB kan thuam tha a. Integrity Pact kan uar thar a, contract hna petu leh a diltute chu unau emaw, inlaichinna nei an nih kan remti tawh lo,” tiin “Financial Advisory System thar kan duang a, Financial sanction hmu tura Finance Department pan zel ngai tawh lovin Department tina Secretary ten an Financial Power milin sanction an pe thei ta a. Hmanni lawkah One Department One Bank System kan kalpui leh a. Department-te sum che vel awlsam taka endik sak zung zungna tur a ni,” a ti.
Heng bakah hian Mizoram Integrated Works Account System siam tharin, hei hi Works Department lian zualah bul tan a nih thu leh Cheque System tihbona tur a nih thu a sawi a, “Advertisement tel lova sawrkar hna lak a awm lo va, qualify lo tumah lak an awm tawh lo. Buhfai buk a lo dik ta hle a, Doctor zinga dik lova Non-Practising Allowance la kan zawngchhuak a, dan lova Family Pension la te chu mahni duh thua in-surrendar turin kan ti a. Mi tam tak an rawn in-surrendar-a, sawrkar sum tam tak kan hum phah a. Lirthei chhiah pe lote lakah pawh hetianga hmalak hi kan rilruk leh mek a ni,” a ti a. “Tawngka ringawtin corruption hi kan do lova, kalphung thar duang chhuakin a tak takin kan do mek a. A dorem turin kan zaa kan tanrual a ngai thung a, ram mipuite chu eirukna do kawnga tangrual turin ka sawm che u a ni,” a ti bawk.