Online hmangin RTI hnuaia zawhna lut a tam
Mizoram Information Commission buatsaih, mipui ten tunlai khawvel thiamna leh changkanna sang zel mil-a online kaltlanga RTI hmanga zawhna an zawh theihna ‘Mizoram RTI Online’ kaltlang hian Mizoram atangin RTI zawhna 7,026 dawn a nih bakah, Mizoram pawn atangin zawhna 95 dawn a ni a. Online kaltlanga RTI zawhna thehluh hi Department hrang hrang Directorate-ah tam berin, RTI zawhna 2,315 thehluh a ni a. Directorate hrang hrang a RTI zawhna lut zinga 52 chu Mizoram pawn atanga thehluh a ni.
‘Mizoram RTI Online’ hmanga zawhna lut zinga 1,236 chu Mizoram Secretariat-a lut a ni a, heng zinga zawhna 34 chu Mizoram pawn atanga rawn lut ni a chhinchhiah a nih bakah Secretariat bika RTI Online hmanga zawhna 1,202 lut chu Mizoram chhung atanga lut ni a chhinchhiah a ni bawk. ‘Mizoram RTI Online’ kaltlang a zawhna lut zingah hian zawhna 678 chu Mizoram chhunga District hrang hrang chungchanga zawhna a ni a, zawhna lut zinga 8 chu, Mizoram pawn atanga zawhna lut a ni.