Niminpiah ah hri kai mi 162 hmuh belh leh an ni

Niminpiah khan Mizoram-ah Sample 847 enfiah niin COVID-19 hri kai mi 162 hmuhchhuah an ni a, Sample enfiah atanga za zela 19.13 zetin hri an kai a ni.

Niminpiah khan ZMC-a RT-PCR Laboratory-ah Sample 5 enfiah niin hri kai mi 3 hmuh an ni a, Lunglei-a RT-PCR Laboratory-ah Sample pakhat enfiah niin hri kai hmuhchhuah an awm lo thung. Fluorescent Immunoassay Test hmangin Aizawl-ah Sample 44 enfiah niin hri kai mi 2 hmuh an ni a, Serchhip District-ah Sample 6 enfiah ni bawkin hri kai mi pakhat hmuh an ni bawk.

District 5-a TrueNat laboratory-ah Sample 14 enfiah niin hri kai mi 5 hmuh an ni a, Lunglei District-ah hri kai mi pahnih hmuh niin Serchhip, Mamit leh Hnahthial District-ah hri kai mi pakhat theuh hmuh an ni. Rapid Antigen Test hmanga Sample enfiah 777 atangin hri kai mi 151 hmuhchhuah an ni bawk a, Saitual District-ah 39, Mamit District-ah 34, Lunglei District-ah 27, Serchhip District-ah 20, Khawzawl District-ah16, Aizawl District-ah 13 leh Champhai leh Kolasib District-ah mi 2 ve ve hmuh an ni bawk.

Nimin khan Mizoram-ah hri kai enkawl dam mi 95 an awm belh a, heti hian Mizoram-a COVID-19 hri kai hmuhchhuah tawh chu mi 2,24,522 niin an zinga 2,22,892 te enkawl dam ni tawhin hri kai atanga za zela 99.27 te enkawl dam an ni tawh a, hri kai enkawllai 945 awmin hri kai zingah mi 685 an boral tawh bawk a ni.