Airport chim-ah State sawrkar in sum a sen belh dawn lo - Principal Consultant

Civil Aviation Wing-a Principal Consultant Wg.Cdr. J. Lalhming-liana chuan Lengpui Airport cheithat hna thawh mek tunhnaia chim ah Mizoram sawrkar hian chengkhat pawh a sen belh dawn lo tih a sawi.

MNF Party in nimin-a Mizo Hnam Run Chhung Inkhawm an neih ah Wg.Cdr. J. Lalhmingliana hian Lengpui Airport chungchang hi a sawi a, Lengpui Airport chu 'North East Special Infrastructure Development' (NESIDS) hmanga siam a ni tih sawiin, “MBJP-ten Covid vanga tawrhna doletna tur sum chu Lengpui Airport siam nan an hmang te min ti, an hriat loh vang a ni,” a ti a. “Lengpui Airport hi North East-ah chuan a tha pawl tak a ni a, a bik takin kan CM hian a ngai pawimawh em em a, a tirah nitin passenger 300 lut leh chhuak dawlzo turin siam a ni a, tunah hian kan CM ruahmanna vekin nitin lut leh chhuak hi mi 1600 vel zel an ni a, a aia lian passeneger 2800 vel lut leh chhuak dawlzo turin kan siam mek a ni,” a ti a. “Hmanni lawkah vanduaithlak takin a chim a, a ri a ring khawp mai, amaherawh chu khami chhiatna avang khan Mizoram sawrkar hian chengkhat pawh a sen belh dawn lo a, Political advantage lo lak tumte kan awm kha a zialo ka ti hle a, a contractor-in ama sum sengin a siam leh vek tur thu hi amah atang ngeiin lehkha kan dawng nghal a ni,” a ti bawk.

Civil Aviation Wing-a Principal Consultant chuan Mizoram-a Helicopter service, Pawan Hans chungchang pawh sawiin, “Helicopter service kan neih mek Pawan Hans hi chuang thei an tam lova, sawrkar laipui chuan a aia lian, company dang zawng turin thu min rawn a, tunah hian kan hotuten an ngaihven mek a, a man to deuh chi tha tak company pahnih (2) neih tumin hmalak mek a ni,” a ti bawk.