FCSK ten MFA Cup Semi Final an lut

MFA Cup khelh mekah Serchhip District aiawh kal FC Serchhip Kawnpui chuan Semi Final an lut ta a, Vawiin hian Semi Final hi khelh nghal tur a ni ang.

MFA Cup vawi 20-na Keifang Centenary Football Ground-a khelh mekah hian intihsiakna tan ni a inkhel tura ruahman, rokhawlhna a awm avanga khelh hun an sawn tak Electric FC, Hnahthial leh Siaha FC te chu nimin zing khan an inhmachhawn a, Siaha FC hian hnehna an chang anih chuan Semi Final lut thei an nih laiin tla chiang tawh Hnahthial FC hian 5-1 in hnehna an chang a, heti hian an Group-ah FC Serchhip Kawnpui in Point 4 hmuin Electric FC, Hnahthial in point 3 an hmu a, Siaha FC in point khat hmuin FC Serchhip Kawnpui hian Semi Final an lut ta a ni.

Heti hian MFA Cup-2022 khelh meka Semi Final khel turte chu hriat kim theih an ni ta a, Group A atangin Kanan FC, Aizawl chuan point 4 hmuin Semi Final an lut a, Group B atangin FC Vengthlang North, Champhai chuan point 6 hmua Semi Final lutin Group C atangin FC Serchhip Kawnpui in point 4 hmuin Semi Final an lut a, Group D atangin Chanmari FC, Lunglei chuan point 6 hmuin Semi Final an lut bawk. 

Semi Final hi Vawiin ah khelh tura ruahman a ni a, Semi Final hmasa zawk Vawiin chawhma dar 11:00-ah FC Vengthlang North, Champhai leh Chanmari FC, Lunglei te hi an inhmachhawn anga, chawhnu dar 2:00-ah  Kanan FC Aizawl leh FC Serchhip Kawnpui te an inhmachhawn dawn bawk a ni.