March thla ah khawnvartui lachhuak ngamlo awm

Indian Oil Corporation (IOC) in khawnvartui (K. Oil) man a tihpun zel vangin khawnvartui semtu Retailer engngemaw zatte chuan mipuite hnen a hralh/khultir tam theih an inring lo a, hemi vang hian March, 2022 a sem tur khul ngam lo an awm nual nia thudawn a ni.

Food Civil Supply & Consumer Affairs (FCS&CA) thawktute hnen atanga Zalen thudawn danin, khawnvartui man tihchhuah thar ber, March 7, 2022 a tihchhuahah Siaha chu a rate (retail price) sanna ber niin, litre khat man Rs. 71.63 niin, rate hlui March 2, 2022-a tihchhuah ah Siaha a khawnvartui litre khat man chu Rs. 61.27 a ni a. Aizawl-ah chuan litre khat Rs. 67.45 niin, rate hlui ah Rs. 56.66 a ni a. khawnvartui man tlawmna ber Kolasib-ah litre khat Rs. 66.34 niin, rate hlui ah litre 55.80 a ni.

Khawnvartui man a san vang hian retailer tam tak chuan khul ngam chi ah an ngailo nia thudawn niin, a rate a san vangin mipui ah khul duh lo an tam an ring a, dahkhawlna hmunhma te a lo buaithlak bawk vangin khulloh ah an tlak rih nia thudawn a ni. 

Aizawl bikah chuan dawr rate in khawnvartui hi litre khat Rs 70-80 velin an zuar tlangpui nia thudawn a ni a, hriat theih chinah Aizawl khawpui chhung bikah chuan retailer ten an quota tur an khullo tlangpui a ni. Retailer ten litre khat a hlawh/hlep an neih chu Rs. 0.40 zel a ni.