Lenkawl

Serchhip District chhung Kanghmun South khuaa Panchayat Bhawan sak thar chu nimin khan Lunglei North bialtu MLA leh Lunglei HPC Vice Chairman V. Malsawmtluanga chuan a hawng.

Serchhip khua in a thlen ‘Rampum Huap Kohhran Pavalai Pawl Intawhkhawm’ vawi 7-na chu nizan khan neih tan a ni a, naktuk Pathianni zan thleng a awh ang.

Serchhip leh Aizawl inkar  NH-02, kawng khuar hnawh thatna hna, Permanent Repairment thawh mek chu nimin khan Bawrhsap, Paul L. Khuma hovin enfiah a ni.

Food and Agriculture Organization (FAO) Women Heroes Award dawngtu Sangau khaw mi ZT. Lalrithangi (Pi Mari-i) chu niminpiah khan Rome khawpuiah chawimawina hlan a ni.

Higher & Technical Education Department chuan nimin khan Secretariat Conference Hall-ah a tum thumna atan ‘Department Review Meeting’ neiin H&TE Minister Dr. Vanlalthlana chuan a telpui.

National Health Mission (NHM) hnuaia Reproductive & Child Health bultuma nu leh naupiang thihna tihtlem theihna tura India sawrkar laipui hmalakna thar, ‘SUMAN Roadmap 2030’ (Surakshit Matritva Aashwasan) chu nimin khan Health Minister Lalrinpuii chuan a tlangzarh.

Ngaizawl khawtlangin ‘Khawdo Kut’ an buatsaih chu Chief Minister Lalduhoma chuan nimin khan khuallian nia hmanpuiin, “Mizo hnam peng hrang hrangte Kut leh ze tha tinrengte chu Mizo hnam thil pawimawh an ni vek,” tiin he Kut hmangtute chu Kut Chibai a buk a ni.

Mizo Writers Association (MWA) buatsaih ‘Lehkhabu Pho Runpui Thawh 6-na’ chu nimin khan Aizawl Vanapa Hall-ah neih niin IPRP&S Department Minister, B.Lalchhanzova chuan a hawng a, he hun hi Mizo mipuite’n lehkhabu hlutna kan hmuchhuah thar leh theihna pawimawh tak a nih thu sawiin, Ziakmite chu hmasang ata mi huaisen leh hlu, vau leh tihthaih kara huaisen taka an chhungril ngaihtuahnate phawrh chhuak thin an nih thu a sawi a, zirna chawisangtu, kan ram meichher kengtute an nih thu a sawi bawk. Minister chuan Lehkhabu chhiar tam hnam chu zirna lamah hma an sawn ngei ngei thu sawiin, zirna chu mi rethei leh hausa thliar lo, mi zawng zawng huang khata min dah theitu a ni tih a sawi a, thalaite leh zirlaite chu ziakmi leh an lehkhabu ziahte ngaihlu thiam turin a chah bawk.