Lenkawl

Thla thar December ni 8-a Thenzawl Vengthar VC by-election neih tura ruahman chu High Court in a ti khawtlai (stay) niin Serchhip West Block MNF chuan an sawi.

PWD Serchhip Division chuan sawrkar kum kal mekah hmun hrang hrang atangin kawngpui siamthatna tur cheng vbc. 81.83 dawngin heng sum hmang hian hna hrang hrang thawh tura ruahman a ni.

Serchhip khawpui chhunga rukruk leh dan bawhchhiatna bakah chhiatrupna lo thlen thulha hman tangkai turin 'Eagle Eye Monitoring and Control System (EEMCS)' kalpui a ni dawn a, hemi atana tul leh pawimawh hrang hrangte chu nimin khan Bawrhsap hova sawiho niin he hmalakna hnuaia CCTV Camera dahna turte pawh sawiho nghal a ni.

India ram chhung leh pawn atanga mi sang nga chuang te tel theihna tur, Aizawl International Half Marathon (AIHM) thawh thumna chu nakum February ni 20 khian Rajiv Gandhi Stadium, Aizawl-ah buatsaih a ni leh dawn.

Tun thla laihawla Mizoram leh Assam Official-te State pahnih inkar ramri buai chinfel tuma Aizawl a inbiak hun tur a la chiang thei lo.

Nimin November ni 9, 2026 kha ‘Legal Services Day’ a ni a, hemi pual hian Mizoram State Legal Services Authority leh Aizawl Thunder tangkawp chuan Aizawl khawpui chhungah Rally an nei a ni.

Nimin khan Chief Minister Lalduhoma hovin Externally Aided Project (EAP) hnuaia Aizawl Sustainable Urban Transport Project (ASUTP) kalpui dan tur sawiho a ni.

Mizoram Liquor (Prohibition) Amendment Act, 2025 hnuaia Local Fruit Beer siam tur (manufacturer) atan mi 12 thlan fel an ni tawh a; phalna neia Local Fruit Beer siamchhuahte hi Distributor atana thlante chauhin an zuar thei dawn a, Distributor ni lo tan Local Fruit Beer hi zawrh chhuah phal a ni tawh dawn lo.

Mizoram Chief Electoral Officer (CEO) R. Zarzosanga chuan nimin khan Aizawl-a SAD Conference Hall-ah Political Party hrang hrang aiawhte kawmin ‘Special Summary Revision of Photo Electoral Rolls’ neih tur chungchanga thil pawimawhte a sawipui a. CEO chuan Election Commission thupek angin November 30, 2026 (Thawhtanni)-ah Integrated Draft Electoral Roll tarchhuah tur a nih thu sawiin, January ni 1, 2027 chu qualifying date atana hman tur a ni a. January ni 1, 2027-a kum 18 tling Electoral Roll-a la chuang lo, India khua leh tui zawng zawngte thun thar a nih tur thu a sawi a. Dilna lut hrang hrang te chinfel a nih hnuah Final Electoral Roll chu January 21, 2027-ah tarchhuah tur a nih thu a sawi bawk.

Mizoram-a khualzin pung chho mek chuan mi tam tak eizawnna a siam sak mek a, tun dinhmunah Mizoram sawrkarah khualzinte thlenna tur Homestay, Hotel Guest House leh Lodge 262  an inziaklut tawh.