Chief Secretary in Serchhip District tlawh mekin Vawiin-ah Department hotute a kawm ang

Zonuna Kawlni (LENKAWL) • April 2, 2022 • Comments • Serchhip

Mizoram Chief Secretary Dr. Renu Sharma IAS chuan zankhat riakin Serchhip a rawn tlawh mek a. Nimin khan Thenzawl-a AH&Vety Department hmalakna te tlawhin Vawiin hian Serchhip-a sawrkar Department hotute kawmin sawrkar hmalakna thenkhat a hmunah a tlawh bawk ang.


Chief Secretary Dr. Renu Sharma hian nimin khan Aizawl atanga Thenzawl thlengin Thenzawl Golf Resort a tlawh a, hetah hian District Bawrhsap Nazuk Kumar IAS bakah Thenzawl SDO (Civil) Pryank Kishore te chuan an lo dawngsawng a, hemi hnu hian Thenzawl-a AH&Vety Department hmalakna tlawhin Kel vulhpunna hmun, Goat Breeding Farm chu tlawhin General Manager Dr. PC. Lalsangzuala leh Manager Dr. Lalramdintluanga leh Dr. Lalmuanpuia Samte ten ten lo dawngsawngin Kel vulhna hmun hi ke in a fang a, Chief Secretary Dr. Renu Sharma chuan Thenzawl-ah AH & Vety Department ten ram zau, nuam leh mawi tak an nei chu lawmawm a tih thu sawiin, an enkawl dan felfai leh thianghlim tak chu fakin tihhmasawn zel theihna tam tak a la awm nia a hriat thu a sawi a. He Farm in hma a sawna hmalakna zau zawk a awm theih nan Department Secretary a titipui tur thu sawiin, hemi hnu hian Dilpui leh Sakawr vulhna hmun te pawh a tlawh nghal a ni.

AH & Vety Department hotute chuan Kel an enkawl mekte hi kum 2019 atanga bultan a ni tih sawiin, Rajasthan leh Punjab atanga an lakluh a ni tih an sawi a. Kum 2019-ah Kel 83 leh 2020-ah 97, a vaiin Kel 180 lakluh tawh a ni tih sawiin, heta tanga Kel no lo piangte hi Kel vulhtute hnenah vulhpun zel tura hralh leh thin an ni a, Kel pa 49 leh a nu 46 an hralh tawh a, tunah hian enkawl lai Kel puitling Sirohi Kel 15, Beetal Kel 89 leh Kel no 25 an nei mek a ni. He Kel vulh-punna hmun hi RIDF-NABARD sum cheng vbc. 6 senga bultan a ni.

Chief Secretary hi nizan khan Thenzawl ah riakin Vawiin hian Serchhip-a Department hrang hrang hotute a kawm anga, Govt. Serchhip College leh District Hospital te a tlawh leh dawn bakah Agriculture Department in ranchaw herna an kalpui pawh a tlawh dawn bawk a ni.