Lenkawl

Asian Games 2026 neih zawh taka India tana Hmeichhe Hockey-a Gold Medal latu Kanghmun South nula, F. Lalthantluangi chuan nimin khan an khua thlengin ropui taka lo hmuah a ni.

Rampum-a ‘Right to Information (RTI) Week’ hman mek chu nimin khan Serchhip District-ah pawh a hawnna neih a ni.

Kumin December 12 zan khian Aizawl-ah ‘Winter Run Mizoram’ neih a ni dawn a, he hun hi inelna ni lovin rilru leh taksa hriselna chawilar nan, ‘Fun Run’ anga buatsaih tum a ni.

Nimin khan Champhai Zotlang Mual-ah Hnahsin Kut 2026 chu neih tan niin Horticulture Minister C. Lalsawivunga chuan a hawng a ni.

Mizoram sawrkar in dan lova pension la ten anmahni duh thu ngeia PPO thehluhna hun a hawn chhungin mi 674 ten an PPO an thehlut a, hemi avanga sawrkarin sum a hum tur zat chu thla khatah Rs.1,25,65,901/- leh kum khat ah Rs. 15,07,90,812/- lai ni thei tura ngaih a ni.

MizoTaxi application-ah Aizawl khawpuia mihring phur sumdawnna lirthei chi 3 - Four Weeler Taxi, Two Wheeler Taxi leh Auto Rickshaw 1,894 ziahluh a ni tawh a, MizoTaxi passenger app bik hi mi 30,737-in an download tawh.

Mizoram Synod enkawl tur Sethawn-a Jordan Centre hawnna leh Pathian hnena hlanna chu nimin khan neih niin Health Minister Lalrinpuii chuan khuallian niin a hmanpui a. Minister chuan Jordan Centre enkawl tur zawnna Advertisement chhuah a nih thu leh chhangtu an awm loh avanga chhuah nawn leh a nih hnuah pawh chhangtu an la awm loh thu a sawi a. Chumi hnuah Kohhran nen inbiakna an neih tak thu te, State Sawrkar leh Synod inremna angin kum 15 chhung Synod-in a enkawl dawn thu leh la tih belh zel theih a nih dawn thu te a sawi a. Jordan Centre enkawlna chu Sawrkarin Synod kutken vek turin a hlan tawp lo tih sawiin, Sawrkar chuan a tih theih ang apiang a la ti zel tho dawn tih a sawi bawk. 

Mizoram Journalists’ Association (MJA) General Hqrs. chuan nimin khan Information & Public Relations Director pension-a chhuak ta K. Vanlalsangi thlahna leh Director thar Mina Zoliani Joute lawmpuina hun Aizawl Press Club-ah an buatsaih.

Mizoram-a Khuh damdawi hmansualna hluar ta lutuk chungchang sawihona ‘Inter-Ministerial Meeting’chu niminpiah tlai khan neih niin hmalak dan tur hrang hrang sawiho a ni.

Aizawl atanga Ekta Nagar, Gujarat thlenga kal tur Mizoram Police Motorcycle Rally Team chu nimin khan Director General of Police (DGP) Mizoram Sharad Agarwal IPS chuan PHQ Aizawl atangin a vailiam.