Mizoram in buhfai a leina leh a chhehvel a sum kalral tihtawp tul tih thu sawi

Mizoram Pradesh Congress Committee (MPCC) General Secretary leh Hachhek bialtu MLA Lalrindika Ralte chuan ram sum leh pai dinhmun siamthat nan leh kan sum hloh a tlem zawk theih nan Mizoram in buhfai a lei leh a chhehvela pawisa kalral chu kan tihtawp vat a tul hle nia a hriat thu a sawi.

Nimin-a Aizawl Press Club-a thuthar thehdarhtute a kawmna ah MPCC General Secretary leh Hachhek bialtu MLA Lalrindika Ralte chuan Mizoram sawrkar hian Supply Department kaltlangin FCI-ah buhfai a lei thin thu leh Central sawrkarin kan state quota atana min pek bak kan mamawh belh pawh a man to, Economic Cost-in lei thin tih a sawi a. Kum 2013 vel atang khan FCI atanga Economic Cost-a a lei thinna aia tlawma Open Market-a a lei theih tak avangin sawrkar chuan FCI atanga a lei thin titawpin Vawiin thleng hian Open Market atangin buhfai hi a lei thu leh hei vang hian sawrkar chuan cheng vaibelchhe tam tak a hum theih phah bawk tih a sawi a ni.

Tuna sawkarin Supply Department kaltlanga Open Market-a buhfai a lei dan sawiin Lalrindika Ralte chuan, a leina man hi sawrkarin bithliahin, ZIDCO kaltlangin lei thin a nih thu leh heti chung hian sawrkar chuan buhfai lei nan hian sum tam tak a la hloh reng niin a sawi a, “Buhfai quintal 1 hi Rs. 2750/- in a lei a, quintal 1 Rs.1500/- in a hralh leh a. Quintal 1 zela sawrkar sum hloh hi Rs.1250/- a ni,” a ti a. “Kumin (2022) January atanga June (Thla 6 chhung) a ZIDCO kaltlanga Buhfai a lei tawh zat chu Quintal 2,95,000 niin, a lei na’n Rs. 81,12,50,000/- sen a ni,” tiin heta sawrkarin sum a hloh zat chu Rs.36,87,50,000/- tihna a nih thu sawiin, thla tina sawrkar sum hloh chu Rs. 6,14,58,333/- leh kum khat chhunga sawrkar sum hloh zat chu Rs. 73,75,00,000/- vel a nih thu a sawi bawk a ni.

Tuna Sawrkarin buhfai a leina man hi a sang hle tih pawh Hachhek bialtu MLA Lalrindika Ralte chuan sawiin, hei aia tlawm zawk hian a lei theih ani tih a hriat thu a sawi a. “Hetianga buhfai kan leina leh a chhehvela pawisa tam tak luangral hi kan ram sum leh pai indaihlohna thlentu pakhat a ni a. Chuvangin, ram sum leh pai dinhmun siamthat nan leh kan sum hloh a tlem zawk theih nan buhfai kan lei leh a chhehvela pawisa kal ral hi kan tihtawp vat a tul hlein ka hria,” a ti a. Buhfai leina man bithliahtu hi sawrkar a ni chunga manto taka sawrkarin buhfai a lei chu tul lo a mipui sum tamtak khawhralna a ni tih pawh sawiin Lalrindika Ralte chuan, “Tuten emaw lo hlawkpui viau mah se, ram sum dinhmun harsat zia ngaihtuaha man tlawm zawka lei ngei turin Mizoram sawrkar ka ngen a ni,” ti bawk.

Comments

Popular posts from this blog