Lenkawl

Serchhip District chhunga National Highway-54 siamthat leh laihzauh hna thawktu KRAM Infracon Pvt. Ltd. te chuan nimin khan Serchhip Sub-Hqrs. YMA te hnenah a tul anga hman turin Ambulance (Eeco Van) an hlan a. Ambulance hlanna puala inkhawm neih chu District Bawrhsap Nazuk Kumar IAS chuan a hmanpui a ni.

Serchhip District chhung Hriangtlang khuaa Retailer te chuan mipuite hnena buhfai an pekchhuah ah buk tlinglo in an pechhuak nia hriat a nih avangin niminpiah khan Serchhip-a Legal Metrology-a thawktute chuan bukna leh buhfai an pekchhuah te an endik a, buhfai buk hi a tlin loh nasat avangin Dan anga mana hremna pek a ni.

Information & Public Relations Minister Lalruatkima chuan Serchhip District a DIPR Office chu sawrkar-a an dil angin Sanctioned post-ah hlan a nih thu I&PR Department in kum 2023 atana inthlantharna niminpiah-a an neih ah a sawi a, District thar- Khawzawl, Hnahthial leh Saitual-ah DIPR Office hawn phalna te, DC Office building-a an awmna tur te sawrkarin an mamawh hriain a buatsaih chhoh zel thu te a sawi bawk. Hei bakah hian I&PR Minister chuan PWD lamah post thar an neih belh bakah, Combined MPSC 2022 kaltlanga MIS Post 4 an neih belh thu a sawi a. Mizoram Information Service indaihlohna sawrkar in hriain kum 2023 atan post 5 an phalsak tiih a sawi bawk.

Serchhip District Anti-Tobacco Squad chuan nikum 2022 chhung khan Dan bawhchhia mi 65 manin heng mi te pawisa chawi tlingkhawm chu Rs. 3700/- a tling.

Niminpiah zing-a Melthum dai-a lirthei che-suala boral Chakma Autonomous District Council (CADC) MDC pahnih, Mohesh Baran Chakma leh Charan Singh Chakma te chu nimin khan Chawngte-a CADC Secretariat kawt-ah ropui taka thlahin vuiliam an ni a, he hunah hian an chanchin sawiin sawrkar mi pawimawh te an tel a ni.

Nimin khan Khawzawl-ah District Disaster Management Authority (DDMA) hmalakna in State Disaster Response Fund (SDRF) kaltlanga lei kangthelhna, Fire Extinguisher semna hun hman a ni a, kg. 4-a rit Fire Extinguisher hi Khawzawl District-a VC awm zawng zawng 38 te hnenah pakhat theuha sem a ni. He hunah hian Fire Extinguisher hman dan leh enkawl dan te inzirtirna neih niin Quick Response Team (QRT), Khawzawl DC Office enkawl ten rikrum leh chhiatna thlen thulha chhan-chhuahhna kalpui dan tur Emergency Rescue Operation an entir a, VC te hi a tak anga tih tir ve nghal an ni bawk.

Aizawl East-II bialtu MLA leh Sports Minister Robert Romawia Royte chuan nimin khan a bial chhunga hmasawnna hnathawh chi hrang 6 te chu tlawhin hnathawh dan a enfiah a, he hunah hian Aizawl Smart City Ltd. hnuaia Chite Football Ground, Artificial Turf phahna tura hnathawh mek te, Aizawl Convention Centre sak mek te, Chite Bridge leh Bazar Haat sak mek te, Armed Veng chung leh Armed Veng chuanhnuai kawr chunga inkal pawhna kawng siam mek te, Mizoram State Sports Council enkawla Armed Veng South Hall Extension hna thawh mek leh 1st MAP Ground, Armed Veng-a Astroturf phah leh hnathawh mekte a tlawh a. Dawrpui Multipurpose Centre bula Basketball Court leh Trauma Centre sak mekte bakah Gym a tlawh nghal bawk.

Lunglei High Power Committee (HPC) sum hmanga lei Aieng herna khawl leh hmanraw chi hrang hrangte chu nimin khan Lunglei HPC Office atangin Vice Chairman Lawmawma To-chhawng chuan a sem a, Lunglei Aieng Society, Mualchin Food Processing Rahsi Veng leh BB Aieng Ramthar ten an dawng a ni. Aieng siamchhuahna te hi FSSAI Registration neia tihfel niin HPC Fund hmanga bul tan te hian an Brand hmingah ‘LEITLANG AIENG’ tih an hmang vek a ni.

Nimin khan Mara Autonomous District Council (MADC)-ah Deputy Chairman thlanna neih a ni a, he inthlan chuhtu mi pahnih te atangin Secret Ballot hmangin Member 22 ten an thlang a, BJP Candidate C. Chehnei, Chapui Bialtu MDC chuan vote 15 hmuin a khingpui INC Candidate ST. Vanmalsawmliana, Meisavaih Bialtu MDC chuan vote 7 a hmu thung a, C. Chehnei chu Deputy Chairman atan thlantlin a ni tih Chairman, N. Viakhu chuan a puang nghal a ni.

Mamit District chhunga Village Council hrang hrang ten 15th Finance Commission atanga sum an hmuh an hman dan chu nimin atang khan endik tan a ni a. Village Council ten an sum hmuh te a nihna tura an hman leh hman loh te, sum an ziah fel leh fel loh te chu Directorate of Local Fund Audit (DLFA) Account and Treasuries Department-a Audit and Accounts Officer H. Lalthlengliana hovin an endik a, tun thla ni 20 thleng hun an hmang ang. Hemi chhung hian Mamit District chhunga VC 56 te sum hmuh leh hman dan endik a ni dawn a, VC 33 te chuan sum dawn an nei lo thung a ni.