Nikum chhungin Serchhip District-ah meizuk khapna dan bawhchhia mi 65 man an ni

Serchhip District Anti-Tobacco Squad chuan nikum 2022 chhung khan Dan bawhchhia mi 65 manin heng mi te pawisa chawi tlingkhawm chu Rs. 3700/- a tling.
    National Tobacco Control programme (NTCP) hnuaia din Serchhip District Anti-Tobacco Squad te hian nikum chhung khan Serchhip District-ah Squad Drive tum 31 neiin heng ah hian hmun 277 tlawhin Dan zawmlo leh bawhchhia mi 65 an man a, heng mite hi Dan in a phut angin pawisa chawitir thin an ni a, an sum chawi tlingkhawm hi Rs. 3700/- a tling a ni. Anti-Tobacco Squad ten dan bawhchhia an man te hi COTPA Section 4, puipunna hmun a meizuk khapna dan bawhchhia te vek an ni a, Anti-Tobacco Squad te pawh hian heng hmun hi enfiah tam berin tum 176 zet an tlawh a, puipunna hmun tih hian Sawrkar Office, Zirna In, Damdawi In, mipui phurhna atana hman Motor leh an dinna hmun te, Hotel leh Restaurant te pawh a huam a ni.

Heng bakah hian kum 18 hnuailam te hnena vaihlo leh a kaihhnawih thil hralh khapna kenkawh dan te, zirna In atanga yard 100 (ft. 300) huamchhunga vaihlo leh a kaihhnawih thil zawrh khapna dan kenkawh dan leh Vaihlo leh a kaihhnawih thil siamchhuah ah Dan in a hlauhawm zia tarlan a phut ang te tarlan a nih leh nih loh te enfiah thin a ni bawk a. Sawrkar Department dangte nen Joint Drive tum 4 neih a ni bawk.


Nikum chhung vek khan Serchhip District Hospital-a Tobacco Cessation Clinic (TCC) chu Mipa 171 leh Hmeichhia 128, an vaiin mi 299 ten panin an zinga mi 248 te chu vaihlo leh a kaihhnawih nghei tura enkawlna pek an ni a, an zinga Mipa 30 leh Hmeichhia 16, an vaiin mi 46 te chuan Vaihlo leh a kaihhnawih te ngheiin hei hi za zela 18.54 a tling a ni.

Nikum chhung vek khan National Tobacco Control Programme (NTCP) hian zirna In hrang hrangah tum 96 zet Vaihlo leh a kaih-hnawih thatloh zia inzirtirna hun an hmang a, heng ah hian zirlai naupang 4923 tel anga chhut niin Training tum 7 an buatsaih bawk a, tlawm-ngai pawl dangte tan tum 12 buatsaih a ni bawk.

Comments

Popular posts from this blog