NH. 54 siamtu KRAM Infracon Pvt. Ltd. in Serchhip Sub-Hqrs. YMA te Ambulance an pe

Serchhip District chhunga National Highway-54 siamthat leh laihzauh hna thawktu KRAM Infracon Pvt. Ltd. te chuan nimin khan Serchhip Sub-Hqrs. YMA te hnenah a tul anga hman turin Ambulance (Eeco Van) an hlan a. Ambulance hlanna puala inkhawm neih chu District Bawrhsap Nazuk Kumar IAS chuan a hmanpui a ni.

Ambulance inhlanna puala inkhawm tawi Chhiahtlang leh Chhingchhip inkara KRAM Infracon Pvt. Ltd. Camp-a neih ah KRAM Infrcon Pvt. Ltd. hotute kut atangin Serchhip Sub-Hqrs. YMA President Kawlthuama chuan Motor Chabi hi dawngin hetianga CSR Fund atanga mipuite mamawh tur Ambulance an dawng chu lawmawm an tih thu a sawi a. Serchhip Sub-Hqrs. YMA hruaitute chuan hun engemaw chen kalta ah khan KRAM Infracon Pvt. Ltd. hotute hnenah hian Serchhip District mipuite tan Ambulance mamawhna a san thu an lo thlen tawh thu sawiin, nikum November ni 5-a Thentlang khuaa Central YMA, Sub-Hqrs. YMA leh Company hotuten inkawmna an neih tum khan Ambulance an pek tur thu hi tihchian a nih thu an sawi a. Hemi hnu hian tihtur tul ang ang te buaipui zui nghalin nimin khan inhlanna hun hman a ni ta a ni.

Nimin-a Ambulance hlanna hun hi KRAM Infracon Pvt. Ltd. Director Deepesh Sharma chuan kaihruaiin he hun hmanpuitu Serchhip District Bawrhsap Nazuk Kumar IAS chuan Ambulance in hlanna hun tha tak an hmang thei chu lawmawm a tih thu a sawi a, “Kawngpui tha in hmasawnna tam tak a keng a, Sawrkar laipui kaltlanga NHIDCL in Mizoram-ah kawngpui tha tak min siamsak hi a lawmawm hle a ni,” a ti a. “Tun atanga kum thum a ral chuan Mizoram-ah kawng tha a awm dawn avangin hma kan sawn phah ngei ka ring a ni,” a ti. Bawrhsap chuan Serchhip District-a hna a rawn zawm tirh lamah Ambulance mamawhna a sang hle tih pawh sawiin, thingtlang zawk ten inenkawlna tha an dawn thuai theihna tura veivahna tur pawimawh tak Ambulance thar kan nei tur chu lawmawm a tih thu a sawi a, YMA leh sawrkar thawhhona a that thu sawiin, hunpui kan hman zawh takah Sawrkar tha nasa takin an tichak tih a sawi bawk.


He hun hi Central YMA General Secretary Prof. Lalnuntluanga pawhin rawn hmanpuiin NGO dangte aia a danglamna chu tanpui ngaite tanpui tura tlawmngaih chhuaha thawktu tak meuh an nihna chu a nih thu a sawi a. NHIDCL hnuaia thawk KRAM Infracon Pvt. Ltd. ten an CSR Fund atanga Serchhip Sub-Hqrs. YMA hnena Ambulance an pe chu lawmawm a tih thu sawiin, tanpui ngai te tanpui tura ke pen an duhna thinlung chu lawmawm a tih thu a sawi bawk.

Comments

Popular posts from this blog