Lenkawl

October 29, 2022 tlai-a Tuirial Airfield peng bula Petrol phurtu Tank Lorry chesual leh kang zui ta a hliam tuar zinga mi C. Zonunmawia (61), Tuirial Airfield Veng chu nimin tlai khan boral lehin he chhiatna thleng avanga thi chu mi 10 an tling ta a ni.

Nakum (2023) January ni 1-a kum 18 tling chin te laa Electoral Roll ennawn hna thawh tur atan nimin khan Draft Electoral Roll chu tarchhuah a ni a, nakum January 15-ah Final Electoral Roll chu tarchhuah leh a ni ang.

Serchhip-a Inter-Branch YMA Football Tournament khelh mekah Serchhip Vengchung Branch chuan Neihloh Branch hnehin Final an lut ve leh ta.

Chhiahtlang South Village Council-a VC Executive Body thar siam tura hmalakna chu kalpui chhunzawm zel niin tunkar Thawhtanni a VC Body thar siam tura thutkhawm (VC Sittting) neih ah VC Body thar siam tum te an kim loh avangin VC Executive Body thar hi siam theih a ni ta rih lo a. Hemi chungchangah hian Serchhip DLAO mawhphurhna la mektu F. Lalnisai chuan LENKAWL zawhna chhangin tun thla ni 11 hmaa VC Sitting chungchang report Chhiah-tlang South VCP hnen atanga dawn anih hnuah a rang thei ang bera hemi chungchang hi tihfel anih tur thu a sawi.

Serchhip District-ah Halpuah leh halmawi chi hrang hrang khapna thupek tihchhuah a ni.

Special Summary Revision 2023 neih tur puala Serchhip District pum huap ‘Digital Poster Designing Competition’ buatsaih a titha puanna leh lawmman semna chu nimin khan Serchhip DC Meeting Hall-ah neih a ni a, he intihsiakna a tel te atangin PC. Lalchamliana (Bazar Hnuai) chu pakhatna niin lawmman ah Rs. 5000/- leh Certificate a dawng a, Lalbiakzuala (Serchhip Hmar Veng) chu pahnihna niin Rs. 3000/- leh Certificate a dawn bakah pathumna Danny Lalmalsawma (New Serchhip) chuan Rs. 2000/- leh Certificate a dawng a. Heng lawmman te hi Serchhip District Election Officer leh Bawrhsap Nazuk Kumar IAS chuan a hlan a ni.

Mizoram Pradesh Congress Committee (MPCC) chuan Deputy Chief Minister hmalakna a Lunglei Municipal Council (LMC) inthlan atana inbuatsaihna thui tak a kal tawh lai leh Political party te pawhin LMC sawrkar siam ngei tuma theihtawp an chhuah mek laia, Ruling Party atanga inthlan tikhawtlai zawnga hmalakna chak tak a awm chu pawi an tih thu an sawi a, kumin chhung ngeia inthlan buatsaih turin an ngen bawk.

Nimin tlai thleng khan Mizoram-ah CO-VID-19 hri kai enkawllai mi 36 an la awm a, nimin khan hri kai chhinchhiah thar 4 awmin hri kai zingah mi 16 te anmahni enkawlna hmun atanga chhuahtir an ni bawk. Nimin tlai thleng khan Mizoram-a COVID-19 hri kai hmuh tawh chu 2,38,883 niin an zinga 2,38,121 te enkawl dam an ni tawh a, hri kai zinga za zela 99.68 te enkawl dam an ni tawh a ni.

Mizoram Finance & Accounts Service Association (MFASA) General Conference vawi 27-na chu nimin khan Aijal Club-ah neih a ni a, he hun hi Health Minister Dr. R. Lalthangliana chuan khuallian nia hmanpuiin Finance Department chu Mizoram sawrkar department hrang hrang zingah a pawimawh ber leh mawhphurna sang ber nei, department dang zawng zawngte khaikhawmtu ber a nih avangin theihtawp chhuaha hma la zel turin MFAS Officer-te chu a chah a. Mizoram Budget leh sum dang zawng zawng enkawltu an nih avangin tha taka Office kal tur te, aikal lak rem lo ber department an nih avangin hriselna ngai pawimawha ram leh hnam tana thawk zel turin duhsakna a hlan bawk.

Tunkar Zirtawpni thleng awh tur Training on National e-Vidhan Application for Nodal Officers chu nimin khan Aizawl-a Assembly Annexe Conference Hall-ah neih tan a ni a, he Training hi Commissioner & Secretary, Mizoram Legislative Assembly Lalhmahruaia Zote chuan hawngin Digital India hnuaiah India ram chu digital lama nasa taka tihhmasawn turin hma lak mek a nih thu a sawi. National e-Vidhan Application hmang hian Assembly rorel thutkhawm a business hrang hrang Questions & Answer-te, Presentation of Reports, Bill leh a dangte chu House-a pharh a nih rualin mipuite hmuh theih turin chhawpchhuah a ni dawn a. Training-ah hian sawrkar department hrang hranga Nodal Officer-te an tel a ni.

Industrial Training Institute (ITI)-a zir mekte, zir chhuak tawhte leh kut themthiamna lama tui leh thiamthil neite tana buatsaih ‘PUM’ Mizoram Innovation Fair chu nimin khan Deputy Chief Minister Tawnluia chuan ITI Aizawl-ah a hawng.

Lunglei Civil Hospital-ah a thlawnna Lung lama harsatna nei te tana inentirna hun buatsaih tur Sri Ramachandra Medical College (SRMC), Chennai atanga rawn kal te chu nimin khan Governor Hari Babu Kambhampati chuan kawmin ni dangah pawh inentirna hun rawn buatsaih thin turin a sawm.

Nikum (2021) January thla atanga kumin October thla thleng khan Champhai District-ah dan lova nungcha tawlhruk man chhuah tum 7 awmin nungcha species hrang hrang tawlh te hi avaiin 723 a tling.

SCERT buatsaih HSLC leh HSSLC Exam-a Science leh Mathematics-a tithate chawimawina hun chu nimin khan Aizawl-a SCERT Auditorium-ah neih niin School Education Minister Lalchhandama Ralte chuan a hmanpui a, he hunah hian zirlai mi 86 te hnenah chawimawina hi hlan a ni.

Nimin atang khan Serchhip District chu COVID-19 hri kai enkawllai awmlohna a ni leh ta.

Serchhip Sub-Hqrs. YMA buatsaih Inter-Branch YMA Football Tournament chu Vawiin hian Semi Final khelh zawh a ni dawn.

Serchhip District Cricket Association (SDCA) chuan tun thla ni 25 atang khian Season Opening Tournament khelh nise an ti.

Serchhip District AH & Vety Officer Dr. R. Lalmakthanga chuan Serchhip-a Vawk vulhtute chu Tualchhung-a sum che vela pawimawh tak an nih thu a sawi.

Mizoram Co-operative Apex Bank (MC-AB) Serchhip Branch chuan nizan hmasa khan Serchhip Bazar Presbyterian Kohhran Hall-ah Financial Literacy Campaign neiin Bank hman tangkaina leh Bank in mipuite tana ham-thatna a siam hrang hrang mipuite hnena inhrilh-hriatna neih a ni a. Hei bakah hian MCAB chu Mobile App leh Gpay hmang ve thei tura RBI lam atanga permission pek an nih tawh leh Unify Payment Interface (UPI) pawh chak taka buaipui(Process) mek anih thu te tarlan a ni.

Nimin khan Serchhip District-ah COVID-19 hri kai hmuhchhuah leh enkawl dam an awm belh lova, nimin tlai thleng khan Serchhip District-a COVID-19 hri kai enkawllai la awm chu mi pakhat niin Lungchhuan khua a hri kai hmuh a ni.