Final-ah S. Vengchung Branch

Serchhip-a Inter-Branch YMA Football Tournament khelh mekah Serchhip Vengchung Branch chuan Neihloh Branch hnehin Final an lut ve leh ta.

Serchhip Sub-Hqrs. YMA buatsaih Inter-Branch YMA Football Tournament khelh mekah hian nimin khan Semi Final hnuhnung zawk khelh niin Serchhip Vengchung Branch YMA leh Neihloh Branch YMA te an inhmchhawn a, Vengchung Branch YMA tan Rosangzuala chuan minute 1-na ah goal khung nghalin minute 25-na ah a khung belh leh a, Neihloh Branch tan minute 38-na ah Lalrinliana chuan rawn khung ve lehin Vengchung Branch tan Jerry Laldikkima chuan goal a rawn khung leh a. Hemi hnu hian tun tuma Team fei ber tih ngam Neihloh Branch tan minute 79-na ah Lalthasanga leh minute 87-na ah Lalramtiama ten goal rawn khungin 3-3 in an inhnehtawk a ni.

Hun pangngaia chak zawk an awm loh avangin Extra Time khelh chhunzawm niin hun tawp dawn hnaih minute 115-na ah Serchhip Vengchung Branch tan Jerry Laldikkima chuan goal rawn khung lehin he goal hmang hian Final an lut ta a ni.

Heti hian Chhingchhip Venghlun Branch leh Serchhip Vengchung Branch te hian naktuk chawhnu-ah Final an khel dawn ta a ni.

Comments

Popular News (Last 30 Days)

Vawiin-ah HSSLC Exam result