DVO in Vawk vulhtute a fuih

Serchhip District AH & Vety Officer Dr. R. Lalmakthanga chuan Serchhip-a Vawk vulhtute chu Tualchhung-a sum che vela pawimawh tak an nih thu a sawi.
Serchhip Town Piggery Cooperative Society Ltd. General Conference vawi 1-na nimin-a Serchhip Hmar Veng YMA Hall-a neih a hmanpuina ah he thu hi sawiin Dr. R. Lalmakthanga chuan, Chawlhkar khat chhunga Serchhip-a Vawk talh te hlut zawng chu cheng nuai khat chuang daih a nih thu leh kum khat ah phei chuan tam tham tak a nih thu sawiin, heng sum te hi khawchhung-ah a leng vel a, a pawimawh in kan vawnhim tlat atan a that thu a sawi a. “Hetiang tur hian Intodelh zel a pawimawh a, kan eikhawp tharchhuak zel turin tan lak a pawimawh a ni,” a ti.

Serchhip DVO chuan Vawk hri, African Swine Fever (ASF) leng laka Serchhip a Vawk vulh te a himna tura mi hrang hrangte dawr-a hman an lo lak tawhna chu lawmawm a tih thu a sawi a, ASF avangin Serchhip-ah Vawk 3899 an thih thu leh Vawk 3000 chuang bawk suat an awm thu sawiin, sawrkar in Vawk thi ralna a pek tur chugchang ah Sawrkar hmalakna ngaichanga dawhthei taka an lo awm avangin lawmthu a sawi bawk a. Thangthar zawk te ranvulh lama an tui zel theih nan kan tu leh fa te kan fuih thar zel a tul thu pawh DVO chuan sawiin, kan ran vulhna hmun tih thianghlim leh a hmunhma mawihnai deuh a siam nachang kan hriat a pawimawh thu a sawi bawk.

Serchhip Town Piggery Cooperative Society Ltd. General Conference hi an President K. Remlalliana chuan kaihruaiin Report hrang hrang ngaihthlak a ni a. Serchhip Town Pigery Cooperative Society Ltd. hi July 19, 2020-a din niin tun dinhmunah hian member 67 an awm mek a ni.