‘PUM’ Mizoram Innovation Fair 2022 neih tan a ni

Industrial Training Institute (ITI)-a zir mekte, zir chhuak tawhte leh kut themthiamna lama tui leh thiamthil neite tana buatsaih ‘PUM’ Mizoram Innovation Fair chu nimin khan Deputy Chief Minister Tawnluia chuan ITI Aizawl-ah a hawng.

‘PUM’ Mizoram Innovation Fair 2022 hawnna hunah hian Deputy Chief Minister chuan thalaite thiam thil tihpuna eizawnna tlinga siam chu tunlai khawvelah a pawimawh thu sawiin, hemi kawnga hmalatu LESDE Department pawh sawrkarin a tuaihnum chho zel tih a sawi a. “Zirna tluang pangngai chu a inrelfelin a inremfel thlup tawh a, zirchhuak an tam a, Degree sang pui pui nei pawh tam tak an awm tawh a, amaherawhchu, eizawnna hna in a daih seng si lo,” tiin “Miin a thiam thil hmanga ei a zawn theihna tur kawng zawnpui hi thil pawimawh leh tul a lo ni lehzual ta a, Degree sang tak nei kher lo pawha eizawnna hlawk tak neih theihna kawng a nih avangin a tangkaiin a pawimawh ta tawlh tawlh a ni,” a ti bawk a. Sawrkar hmalakna SEDP hnuaiah kuthnathawktute khaichhuahna leh intodelhna tur ruahman a nih thu pawh Deputy Chief Minister chuan sawiin, “Skill Training hi SEDP hlawhtlinna tura hmanraw pawimawh a ni,” a ti bawk.

He hunah hian Labour, Employment, Skill Development and Entrepreneurship (LESDE) Minister Lalchhandama Ralte pawhin tun dinhmunah Mizoram-ah ITI pathum - Aizawl, Lunglei leh Siaha-ah te a awm mek thu leh hmun pali dang - Champhai, Serchhip, Kolasib leh Mamit-ah te din leh tum niin ruahmanna a kal mek thu a sawi a. Mamit-ah hian building sak zawh tawh niin Session tharah tan hman tum a nih thu a sawi bawk.

Ni thum awh tur PUM-2022, Innovation Competition & Exhibition Fair hi a tum hnihna atan Ministry of Skill Development & Entrepreneurship (MSDE) hnuaiah LESDE chuan a buatsaih a. ITI-a zir mekte, zir chhuak tawhte leh kut themthiamna lama tui leh thiamthil neite tana buatsaih niin, an thil siamchhuahte phochhuah a ni a. Inelna a nih bakah an thil siam te mipui tan lei theiha zawrhchhuah a ni. Sum leh pai senso hi Sawrkar laipui Scheme Skills Strengthening for Industrial Value Enhancement (STRIVE) leh Skills Acquisition and Knowledge Awareness for Livelihood (SANKALP) atanga hmuh a ni a. Inelna hi thuang hnih - Engineering leh Non-Engineering Group-ah then a ni a. Engineering-ah hian mi 25 telin Non-Engineering ah 39, a vaiin mi 64 an tel a ni. Skill and Entrepreneurship Award sem a ni dawn bawk a, hei hi District tin atangin District Screening Committee ten thlangchhuakin State Level Screening Committee in a lo endik leh dawn a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man