Electoral Roll ennawn hna thawh tan niin Hming thun leh siamthat duh tan dil theih a ni

Nakum (2023) January ni 1-a kum 18 tling chin te laa Electoral Roll ennawn hna thawh tur atan nimin khan Draft Electoral Roll chu tarchhuah a ni a, nakum January 15-ah Final Electoral Roll chu tarchhuah leh a ni ang.
Election Commission of India in ruahmanna a siam anga Electoral Roll ennawn hna thawh tur atana Draft Electoral Roll tarchhuahna hun hi nimin khan Serchhip DC Meeting Hall-ah neih niin he hunah hian Serchhip District Bawrhsap leh District Election Officer Nazuk Kumar IAS chuan Draft Electoral Roll hi a tlangzarh a, Electoral Roll ennawn hna thawh chhunga hmalak dan tur hrang hrangte tarlangin, Electoral Roll dik leh felfai kan neih theihna tura tanrual a pawimawhna te a tarlang bawk a. Political Party hrang hrangte leh Serchhip Sub-Hqrs. YMA hnenah Draft Electoral Roll hi a sem nghal bawk a ni.

Draft Electoral Roll tlangzarh taka a lan danin Serchhip District-ah hian Assembly Constituency pathum (3) awmin Polling Station 88 a awm a, heng Assembly bial pathum-ah hian Vote nei thei mi 53,326 awmin an zinga 419 hi Service Voters an ni a, General Voters 52,907 awmin heng zinga 25,724 te chu Mipa niin midang 27,183 te hi Hmeichhia an ni thung a, Service Voters 419 zinga mi 416 hi mipa niin a dang 3 hi hmeichhia an ni thung. Serchhip District chhunga Assembly Constituency zingah 26-Serchhip (ST) AC-ah Polling Station 29 awmin Vote nei mi 19,966 an awm a, 27-Tuikum (ST) AC-ah Polling Station 32 awmin Vote nei mi 16,523 an awm bakah 28-Hrangturzo (ST) AC-ah Polling Station 27 awmin Vote nei 16,418 an awm a. Assembly Bial tinah hian Vote nei thei zingah mipa aiin hmeichhia an tam zawk vek a ni.

Nimin-a Draft Electoral Roll tarchhuah a nih atang hian nakum January ni 1-a kum 18 tling tur chinte ten hming ziahluh dilna hun hawn nghal a ni a, hemi rual hian Electoral Roll-a hming chuang tawh siam that, paih leh tihdanglam theihna hun pawh December ni 8, 2022 thleng hawn zui nghal a ni a. Khaw tina Booth Level Officer (BLO) ten an bial chhungah a umzui hna an kalpui ang. Sawiselna leh siamthat ngai dilna lutte hi December ni 26, 2022-ah ERO leh AERO ten an chingfel ang a, nakum January ni 15-ah Final Electoral Roll chu tarchhuah a ni dawn a ni.


Comments

Popular News (Last 30 Days)

LPG man bithliah thar