Science leh Mathematics-a titha zirlaite Incentive Cash Award hlan an ni

SCERT buatsaih HSLC leh HSSLC Exam-a Science leh Mathematics-a tithate chawimawina hun chu nimin khan Aizawl-a SCERT Auditorium-ah neih niin School Education Minister Lalchhandama Ralte chuan a hmanpui a, he hunah hian zirlai mi 86 te hnenah chawimawina hi hlan a ni.

Nimin-a Incentive Cash Award for Proficiency in Science & Mathematics hlanna hunah hian School Education Minister chuan zirlai titha lawmman dawngte chu an thiamna leh theihna ram tana hmang tangkai ngei turin a fuih a. Mizoram UT kan nih laiin Assembly Session-in zirlaite chu Science leh Mathematics thiam tura cho chhuah an nih theihnan zirlai tithate chawimawina an lo duang chu a hlawhtlinna hmuh tur a tam ta hle tih sawiin, UT hun laia High School-a Science leh Mathematics zirtirtu-a Mizo awm mang lo kha tunah chuan Mizo thalai lak tur tam tak an lo awm ta tih a sawi a. Sawrkarin zirna kawnga hma a laknaah Zirlaibute hi Mizo zirlaiten mahni tawng ngeia an thiam theih nan Bilingual Textbook a siam a nih thu leh peihfel tep a nih thu sawiin, pawl 9 leh pawl 10 zirlaibu atangin bul tan a nih tur thu a sawi bawk.

He hunah hian School Education Department Secretary Dr. Lalzirmawia Chhangte chuan Science Laboratory Manual tlangzarhin tunlai naupangte hian zir ngai lova thiam tura inngaihna lian tak an neih thu leh thil tam tak chu an thiam mai bawk tih a sawi a, hei hi chawh thawh thiam a tul thu leh competition rilru lo tlahniam ta pawh hi chawisan vat ngai a tih thu a sawi a. Mi tinin ni khat-a darkar 24 theuh kan neih chu midangte thiam ang kan thiam ve nan hman tangkai a pawimawh thu a sawi bawk.

Incentive Cash Award for Proficiency in Science & Mathematics hi kum 1978 atang khan sem niin kumin hi vawi 45 semna a ni a, HSLC atangin mi 66 leh HSSLC atangin mi 20, an vaiin mi 86 in lawmman hi an dawng a. Science leh Mathematics-a titha chawimawina dawngte hi pakhatna lawmman dawngten Full Mark 100 an hmu a, pahnihna dawngten Mark 99 leh pathumna dawngten mark 98 an hmu a ni.

Comments

Popular News (Last 30 Days)

LPG man bithliah thar