Mizoram-a rawn kal Doctor thiam Larsap in a kawm

Lunglei Civil Hospital-ah a thlawnna Lung lama harsatna nei te tana inentirna hun buatsaih tur Sri Ramachandra Medical College (SRMC), Chennai atanga rawn kal te chu nimin khan Governor Hari Babu Kambhampati chuan kawmin ni dangah pawh inentirna hun rawn buatsaih thin turin a sawm.

Lunglei District Bawrhsap Kulothungan A sawmna angin SRMC, Chennai atanga Lung Doctor thiam rual te hian tun thla ni 10 atanga 12 chhung hian Lung lama harsatna nei te tan Lunglei Civil Hospital-ah a thlawnna inentirna hun an buatsaih dawn a. Hemi rual hian Lunglei Civil Hospital-ah tho hian Cancer natna vei te pualin Cachar Cancer Hospital and Research Centre atanga Doctor rual ten Free Clinic an buatsaih dawn a ni.

Nimin-a Raj Bhavan-a an inkawmna ah hian Governor Hari Babu Kambhampati chuan a mikhual te chu Mizoram-ah lo lawmin, an thil rawn tih tur chu mipui rawngbawlna ropui tak a nih thu a sawi a. Mizoram-ah inen-kawlna damdawi In changkang zawk te kan la neih loh avangin hetiang anga natna khirh deuh inentirna hun hi nidangah pawh rawn buatsaih thin turin a sawm a. Lunglei DC hmalakna zarah damlo ten anmahni kawtkaiah Doctor thiam an rawn thei tur chu lawmawm a tih thu sawiin, District dang te pawh hetiang lamah hian an bengvar tha a tih thu a sawi bawk.

SRMC Doctor te hi Cardiologist leh Cardiac Surgeon te an ni a, Dr. JS Satya Narayana Murthy, Head of Cardiology Department chuan SRMC Team hi a rawn ho a, an Team-ah hian member 7 lai an awm bawk a ni. Anni hi Lunglei-ah Cachar Cancer Hospital and Research Centre atanga Cancer enkawltu doctor rual ten an rawn fin dawn bawk a ni.