Lenkawl

Nimin khan Serchhip District-ah COVID-19 hri kai mi 56 hmuh leh niin niminpiah aiin hri kai hmuh hi an tam leh hret a ni.

Serchhip District Cricket Association buatsaih CK Frolics Cup-2022 chu Vawiin chawhma dar 11:00 hian DC Playground, Khawtetlang-ah Final khelh a ni dawn a, Hmar Veng CC leh Pacers CC, Aizawl ten Final an khel dawn a ni.

COVID-19 hri leng in ziaawm lam a pan tak avangin tun thla ni 11 atang khan Mizoram a Jail hrang hrangah Sakhaw lam rawngbawlna (Religious Service) leh Tang tlawh (Prisoner Interview) te a pangngaia neih phal a ni leh tawh tih Serchhip District Jail Superintendent Laldingliana Chinzah chuan LENKAWL a hrilh a. Sawrkar dan dinglai (SOP) chu Jail a him zawk nan tha taka zawm tur a nih thu leh inkhawmna ah zai leh hla sakho phal a nih loh thu a sawi bawk.

COVID-19 hri kai hmuhchhuah an pun zel avang leh hri leng darh tur venna atana Serchhip Vengchung VC huamchhung hmun thenkhat leh Thentlang khua te Feb. 22, 2022 atanga Restricted Area-a puan chu COVID-19 natna kai te an dam tak avang leh Contact Tracing tih zawh a nih tawh avangin tun thla ni 8 tlai dar 5:00 atang khan Restricted Area-a puanna chu hlih a ni.

Tunhnaiah Serchhip Bukpui-ah COVID-19 hri kai hmuhchhuah an pun avang leh hri leng darh zel tur venna atan nasa zawka hmalak a ngai nia hriat a nih avangin Serchhip District Bawrhsap Nazuk Kumar IAS chuan Serchhip Bukpui chu March 11, 2022 tlai dar 3:00 atangin thu leh awm hma chu Restricted Area atan a puang.

Aizawl Municipal Corporation Board of Councillors Meeting chuan ‘Aizawl Day’ atan Aizawl khawpui mei mit lova a din champhaphak February 25 chu an pawm.

THAT LOH THEIH LOHNA BAWM - Kapliana Pachuau, Journalist

Nimin khan Mamit-ah District Bawrhsap Lalnunhlua hovin NH 44A siam mektu PWD hotute leh Contractor bakah District thuneitu ten Aizawl lam atanga Mamit kaltlanga Tripura panna kawng, NH 44A kawng sial hna thawh mek chungchang ah inkawmhona an nei a. He hunah hian Dampui Diversion chu April thla chhungin Blacktop zawhfel vek an tum thu kawng siam mektu Contractor chuan sawiin, Tuidam Diversion pawh buaina dang a awm loh chuan May thla chhungin zawhfel an inbeisei thu a sawi a. Darlak Teirei Lei dawh thar tur chu kumin December thla ralhmaa dawhfel hman an tum thu a sawi bawk.

Joint Action Committee on Inner Line Reserved Forest Demand chuan ramri venhim kawngah nasa zawkin ke an pen zel dawn tih sawiin, 1875 BEFR chauh chu Assam nen kan inkarah ramri a pawm theih kan neihchhun a ni tih an sawi nawn leh a. Mizoram tlawha rawn zin India Vice President hnenah Assam nena kan buaina ber, 1875 BEFR chungchangah Memorandum leh Supplementary notes an lo pek thu leh Vice President hian a tul ang zela Home Ministry lamah a lo bawhzui tur bakah heng ramri buai hi chu UNO emaw, rampawn lam chinfel ai chuan a ramchhunga awm ngei te hian kan chingfel tur a ni zawk tih alo sawi tih thuchhuah siamin an tarlang bawk.

Mamit-a One Stop Centre Office Building thar chu nimin khan Mamit District Bawrhsap Lalnunhlua chuan a hawng a, he building hi Rs. 38,06,820/- sengin October, 2020 khan sak tan a ni. One Stop Centre-ah hian hmeichhia tupawh, hleilenna tuar emaw, nupa kara harsatna nei emaw, mahnia harsatna sutkian zawh loh neite tan kum bithliah awm lova pan theih a ni a. Ni nga (5) leh zan nga (5) thleng a awm lailawk theih a ni.