Serchhip khawpui chhunga leiminna hmun te enfiah
Tun thla ni 9-a Sub-Hqrs. YMA Ser-chhip hruaitu ten Chief Minister, Lalduhoma an hmuh khan Serchhip khawchhung lei che thin leh hemi avanga harsatna thleng thin te thlenin, heng lei che thin te venna atan hmalak sak turin an ngen a. Chief Minister chuan Geology and Mining Department hotute be nghal in Serchhip khawpui chhung Veng hrang hranga lei che thin te chu zirchiang turin thurawn a pe a. Hemi ang hian nimin khan Serchhip-ah hian Geology & Mining Department atangin Sr. Geologist Benjamin Roluahpuia bakah Malsawmkima, Geologist bakah Lab. Technician Henry Lalchhuankima bakah thawktu dangte an rawn kal a, Serchhip DC Office atanga SDC Vanthangpuia bakah Sub-Hqrs. YMA Serchhip hruaitu ten lo dawngsawngin Serchhip khawpui chhung hmun hrang hranga leimin thin te chu a hmunah tlawhin an enfiah a ni.
Geology & Mining Department atanga lo kal te hi Team pahnih-ah insiamin Team pakhat hian tunhnaia Serchhip P&E Veng-a lei che leh chhungkaw panga lai ten an chenna an rauhsan mek chu tlawhin leilung dinhmun te an enfiah bakah leimin thlenna chhan tlangpui nia lang te an enfiah a, hemi hnu hian Serchhip Bazar Hnuai-a nikum lama lei khi awmna hmun te an tlawh bawk a. Team pakhat te hian Serchhip Hmar Veng leh Leisang Veng inrina vela lei che thar awmna leh nikum lama Serchhip Field Veng-a leikhi awmna bakah Ser-chhip Chhim Veng mawnglam-a lei chetna hmun te an enfiah a. Hemi hnu hian Team pahnih te hian nikum lama Serchhip Dinthar Veng-a lei chetna hmun leh Serchhip leh Keitum inkara leimin lian tham deuh awmna te an tlawh bawk a. Geologist lo kal te hian an thil hmuhchhuah ang ang te sawrkar-a an thehluh dawn bakah rawtna pawh an siam nghal tur thu an sawi a ni.