Israel Embassy-a Water Resources Specialist te lo zin

Public Health Engineering Department Minister Prof. Lalnilawma’n Mizoram tlawh tura a sawm angin Israel Embassy-a International Development Co-operation (MASHAV) Senior Water Resources Specialist Neeraj Gahlawat leh Partnership and Operations Head Arpit KP-te chuan niminpiah khan Mizoram an lo thleng a, PHE Department Engineer-ten lo dawngsawngin Aizawl Water Supply Scheme en turin Tlawng lui-ah hruaiin tui supply hnathawh kalphung leh harsatna hrang hrangte an enpui a, Fur laia tuilian nasa leh tui chim chin sang lutuk te, tui nu (turbidity) sang lutuk te, Thal laia tui kam nasa leh silt deposit (siltation) chungchang te an sawiho nghal bawk a ni.

PHE Minister Prof. Lalnilawma hian New Delhi-a a zin tum khan Israel Embassy lam hotute nen an inkawm a, he inkawmna ah hian Mizoram rawn tlawh a Mizoram tana thawhhona kawng hrang hrang zawngho turin a sawm a, Minister sawmna ngaipawimawhin Israel Embassy atanga mithiamte hian Mizoram an lo tlawh a. Minister Prof. Lalnilawma chuan Israel Embassy-te chu inkawmna hun neihpuiin thawhhona tha tak leh hlawhtling tak an neih ngei theih nan Mizoram Sawrkar lam chu a inhawng reng tih a sawi bawk.