Serchhip-a Independence Day hman dan tur rel a ni
Kumin-a Serchhip-a India Independence Day lawmna ah hian Sports Minister Lalnghinglova Hmar chu khuallian tura beisei niin Serchhip Sports Complex-ah zing dar 10:00 atangin hun hman a ni anga, Khuallian in Hnam Puanzar pawt parhin March past-a tel tur School Contingent 15 leh NCC Govt. Serchhip College-te beisei an ni a. Kum danga tih thin angin he ni pual hian Serchhip a Orphanage Home, Observation Home, Hospital leh Jail etc. ah te thilpek sem a nih leh dawn bakah Independence Day pualin Football, Tennis leh Table Tennis Tournament te neih a ni dawn bawk a. Independence Day lawmna programme neih zawhah DC Bungalow-ah VIP’s At home neih a ni bawk ang.
Serchhip-a India Independence Day hman tur hi Serchhip DIPR Office chuan mipui, a duh apiangte’n TV leh Youtube kaltlanga an en theih nan live-in an pechhuak dawn bawk a. Nimin-a thutkhawm ah hian Department hrang hrangte chanvo leh mawhphurhna te sawiho niin Serchhip District Deputy Commissioner Paul L. Khuma chuan ram leh hnam tana thawhhona tha neih a pawimawhzia sawiin hun a khar a ni.