NABARD, Mizoram Regional Office Foundation Day vawi 45-na lawm a ni

Zonuna Kawlni (LENKAWL) • July 17, 2026 • Comments • Mizoram

National Bank for Agriculture and Rural Development (NABARD) Mizoram Regional Office chuan nimin khan an dinchampha 'Foundation Day' vawi 45-na chu an Office Conference Hall-ah an lawm a, Food, Civil Supplies leh Consumer Affairs Minister B. Lalchhanzova chuan a telpui a ni.

NABARD, Mizoram Regional Office 'Foundation Day' lawmna ah hian Supply Minister chuan kuthnathawkte hmasawnna kawngah NABARD chuan a thawk tha hle nia a hriat thu sawiin, CODNERC Chairman a nih chhunga Thenzawl Handloom Cluster Project sanction hmanga Mizoram Handloom Sector chawilar a nih dan te a sawi a. NABARD chuan Rural Development atana hma an lak danah tualchhung/ khawtlang boruak mil zelin leh mipui mamawh ang zela hma la zui zel turin a chah a ni.

He hunah hian NABARD-a General Manager (OIC), Bhaskar Manta chuan inlawmna thu sawiin, Mizoram-a NABARD hmalakna leh hlawhtlinna hrang hrangte tarlangin, State chhunga institution hmalakna hrang hrangte pawh Lalrokunga Chhakchhuak, DGM, NABARD chuan a tarlang bawk a, RBI General Manager T. Lhungdim te, Mizoram Rural Bank-a Chairperson Sheryl L. Vanchhong leh Mizoram Cooperative Apex Bank (MCAB)-a CEO A. Lallungmuana te pawhin thu an sawi bawk a. Mizoram University Department of Economics atangin Prof. Lalhriatpuii chuan ‘Hmeichhe kaihhruai Agriculture hmasawnna’ (Women-Led Development in Agriculture in Mizoram) tih thupui hmangin zirtirna a pe bawk a ni.

NABARD hi Agriculture leh thingtlang hmasawnna (Rural Development) atana Development Financial Institution sang ber (apex) atana kum 1982 khan din a ni a, rampum ah kawng hrang hranga hmalakna kalpuiin Mizoram-ah pawh kawng hrang hrangin hmalakna a kalpui thin a. Nimin-a NABARD, Mizoram Regional Office-in 'Foundation Day' vawi 45-na an lawmna hunah hian NABARD hnuaia puihna dawngtu Farmer Producer Organisation (FPO)-te thil siamchhuah pholanna (Exhibition) buatsaih a ni bawk a, Mizoram-a NABARD-in a inrawlhna hmanga loneitu pawl leh thingtlang lama hmalakna hrang hrangte hlawhtlinna tarlanna a ni bawk.