Mizo Hmeichhe Tangrual (MHT) kum 80-na lawm
Aizawl Khatla North Presbyterian Kohhran Hall-a MHT Oak Jubilee lawmna ah hian Minister Lalrinpuii chuan Mizo Hmeichhe Tangrual (MHT) in kum 80 an tlin lawmpuina chibai bukin, Hmanlai kan society hnufum tak, hmeichhiaten rorelna leh thutlukna siam kawnga chanvo an neih tlem laia hetiang pawl ropui tak a lo ding thei leh hruaitu hmasate inpekna chu ropui a tih thu a sawi a. Ram buai leh hun harsa lai (1968 chho) pawha Motherless Babies' Home hial an lo din thei te chu fakawm a tih thu a sawi bawk.
Minister Lalrinpuii chuan kum 2023 MLA inthlanpuiah hmeichhia pathum lai thlantlin an nih thu leh Cabinet Minister meuh pawh an awm ve theih tak thu sawiin, Mizo hmeichhia ten hma an sawn zel chu lawmawm a tih thu a sawi a. “A chak apiang leh a fing apiang hi an dingchhuak lo a, an hun tawna danglamna thleng mil zela inherrem thiam apiang an dingchhuak thin,” a ti a. Mizo hmeichhiate chu hun danglam zel mila inher-rem thiam tura chahin, Ruihhlo, HIV/AIDS, Cancer leh nupa inthenna hluar te chu Mizo Society-in a hmachhawn mek an nih avangin, heng laka kan ram vawnghim tur hian hmeichhiaten mawhphurhna sang tak an neih thu a sawi bawk.
He hunah hian MHT Secretary Maria Lalchhanhimi hnen atangin an pawl chanchin leh an hmalakna te tarlan a ni a, MHT hi July 16, 1946 a din niin ‘Mizo Hmeichhia leh Naupangte Chawisan’ tih chu an Motto a ni a, an hmalakna zingah kum 1968 khan ‘Motherless Babies' Home’ dinin tun thlengin naupang 418 lai enkawl an ni tawh a. Aizawl khawpuia hnathawk leh lehkha zir, hmeichhe chanhai zawkte tan kum 1980 khan ‘Working Women's Hostel’ chu dinin mi 1700 bawr velin an chhawr tangkai tawh a. Hmeichhiaten mahni intodelh nan leh eizawnna an neih theih nan kum 2016 atang khan Puanthui zirna hawngin heng bakah hian tunhma lamin Maternity and Child Welfare Clinic (1956-1973) leh Loin Loom Centre (1962-1967) te an lo kalpui tawh bakah, kum 1968-a Chanmari atanga Kulikawn inkar alkatra a luan turin Prime Minister Jawaharlal Nehru chu an lo ngen hlawhtling tawh bawk a ni.
MHT hian Aizawl khawpui laili takah LSC thlap neiin building puitling tha tak, motor parking chhawng hnih awmna tur sak thar an tum mek a. Heta tang hian Mizo Handicraft Emporium, Restaurant, Conference/Meeting Hall leh Day Care cum Recreation Centre te hawngin sum cheng nuai 949 vel mamawh turin an in chhut a ni.