MSU-in UG result chhuaka Mizo titha an chawimawi
MSU in UG Topper te lawmpuina hun an buatsaih ah hian Minister C. Lalsawivunga chuan zirlai an lawmpui te chu taimakna, tumruhna leh tih tak takna an neih avanga hlawhtling an nih thu leh an hma hunah chhawr tlak ni turin a fuih a. Mizo thalai te chu All India Sevice-ah lut kan tam tawk lo chu tan lak a ngaih thu leh UPSC lama kan theihtawpa kan beih bakah SSC pawh ngaihven thar a, Mizo thalai tam zawk luh tul a tih thu a sawi a. Mahni hmasialna, duhawmna, hlemhletna, eirukna hian Mizo nun a tihchhiat thu sawiin, “Kan Chief Minister kaihhruaina hnuaiah he sawrkara a fawng vuantu te hi eirukna lakah hian kan la fihlim niin ka hria, ka lawm hle a ni. Kei pawhin ka eiru lo,” tiin ram siamtha turin mitin te kan pawimawh thu a sawi a, “Kan kawng zawng zawngah kawng min kawhhmuh theitu Pathian hre rengin; a ni in kawng chu min kawhhmuh zel ang,” a ti bawk.
MSU hian tun tumah hian Mizo zirlai Subject Toppers mi 24 te bakah SU Leader mi pahnih te chawimawina thuziak leh pawisafai an hlan a, he hunah hian MSU President, B. Lalkhawngaiha chuan Overall Gold Medalist panga (5) zingah Mizo pali (4) lawmpui tur an nei chu lawmawm a tih thu sawiin, ram leh hnam hmangaih turin Zirlaite chu a fuih a, ram leh hnam hmangaih lo Officer leh Politician te chu ram leh hnam tan an hnawksak thu a sawi bakah Aia upa te zahthiam a, kan zirthiamna in zonun zemawi hliahkhuh lo se, nakin thlenga lawmpui zel tlak mi hlawhtling a inchherchhuak turin Zirlaite chu a fuih bawk a. He hunah hian Mizoram Rural Bank (MRB) Senior Manager (FI), V. Lal-rinmawia chu khual zahawm niin zirlaite fuihna thu a sawi bawk a, Mizo thalai a tam thei ang ber Banking Service-ah lut turin a sawm bawk.