Congress Party in FCRA Bill dodal zel an tum thu sawiin July 21-ah 'Black Day' hman tum

Mizoram Pradesh Congress Committee (MPCC) chuan sawrkar laipuiin Foreign Contribution (Regulation) Amendment Bill 2026 a chhawpchhuak chu Kristian-te nekchepna hmanrua a nih avangin a tawp thlengin an dodal dawn tih sawiin, tun thla ni 21 khian 'Black Day' hman an tum thu an sawi.

Nimin-a Aizawl-a thuthar lakhawmtute an kawmna ah MPCC Treasurer Dr. Lalmalsawma Nghaka chuan Foreign Contribution (Regulation) Amendment Bill 2026 chuan NGO leh Kohhran hrang hrangte foreign funding chungchangah harsatna nasa tak a thlen dawn niin a sawi a, he Bill hian sawrkar laipuiin 'Designated Authority' a din tur kuta Kohhran leh NGO thil neih zawng zawng lut vek thei turin dan a siam thar nia sawiin, FCRA registration cancel a nih emaw, harsatna engemaw avanga a hun hmaa renew hman a nih loh emaw chuan NGO leh Kohhran ten Biak In, School, College, Damdawi In leh an ram neih hrang hrangte chu sawrkarin a chhuhsak vek thei dawn niin a sawi.

He Dan thar hnuaiah hian FCRA Certificate renew tur pawhin pawl te chuan kum hnih (2) chhungin cheng nuai 10 tal Foreign Contribution an hman a ngai tih sawi bawkin, hetiang zat sum dawng phak lo leh hmang tling lo pawlte chu an license cancel sak niin, an asset-te sawrkar kut-a a luh vek dawn avangin sawrkar thuk taka inrawlhna tur a ni tih MPCC Treasurer chuan a sawi a. Hei hian Kohhran hrang hrangte rawng-bawlna leh inenkawlna hna tam tak a tihthuanawp an hlau hle tih a sawi a ni.

MPCC Treasurer chuan he Bill hian Sakhaw hrang hrang leh Secular NGO-te a huam vek hmel hle nain, India rama Kristian-te chu Foreign Funding dawng nasa berte an nih avangin he dan hian a bitum riau nia an hriat thu a sawi a. Hemi avang hian MPCC chuan a tawp thlengin an dodal dawn tih sawiin, Foreign Contribution (Regulation) Amendment Bill (FCRA) leh India ram chhunga Kristian te tihduhdahna hluar zel duhlohna lantir nan July 21, 2026-ah 'Black Day' hman an tum thu an sawi a ni.