Intellectual Property (Mizoram Craft Items) zirhona nei

Mizoram Handloom and Handicrafts Development Corporation Limited (ZOHANDCO) buatsaihin nimin khan Aizawl-a Lianchhiari Run Conference Hall-ah ‘State Level Workshop on Intellectual Property (Mizoram Craft Items) neih a ni.
He Workshop hi Art & Culture Minister C. Lalsawivunga chuan hmanpuiin hmakhawsang atanga vawiin thlenga Mizo kutthemthiamte kutchhuak a hlutzia leh kan hnam nihna ‘identity’ pakhat a nih avangin chawisan zel a pawimawh thu a sawi a; chawilar a pawimawh tluk zetin neitu nihna venhim a pawimawh thu a sawi a. Mizo puan thenkhat pawh Geographical Indication tag neih tawhin, hmalak belh zel a ni te chu lawmawm a tih thu a sawi a. ZOHANDCO in kan thil neih leh siamchhuahte venhimna hrang hrang Intellectual Property Rights (IPR) chungchang zirhona a buatsaih chu hlawkthlak taka hmang turin kalkhawmte a duhsakna a hlan a ni. 

Art & Culture Minister chuan kutthemthiamte hmakhua sawrkarin a ngaihtuah nasat thu leh anmahni chawikan tura a inhawn thu a sawiin, Hmasawnna hmuh tur a awm zel thu a sawi a. He huna kalkhawmte chu The Patents Act,1970, Copyright (Amendment) Act 2012, The Trade Marks Act, 1999 leh The Designs Act, 2000 te chu kan cukture leh kutthemthiamte kutchhuak venhimna atana hman tangkai theih dan tur zirchian a pawimawh a tih thu a sawi bawk.

He Workshop-ah hian Rodingluaia, Asst.Manager, Marketing leh Kaphnuni, State Awardee ten thu sawiin, Dr. Malsawmtluangi, Hnam Chhantu Pawl hnen atangin ‘Traditional Design & Modern Interpretation on Mizo Craft Items’ tih hmangin thusawi ngaihthlak a ni a. Panelists Carol VL MS Dawngkimi, Director, Art & Culture Department; Dr. Malsawmtluangi, Hnam Chhantu Pawl; PC. Lalthangmawia, Research Scholar, MZU leh Alfred Zothansanga, NEZCC, Board of Governors ten sawihona an nei zui bawk a ni.