May - June 2026 chhungin NEC-in Mizoram tan cheng vbc. 20.17 an pechhuak

Ministry of Development of North Eastern Region (DoNER) hnuaia awm North Eastern Council (NEC) chuan May-June 2026 chhung khan Mizoram tana hmasawnna ruhrel siamna atan cheng vbc. 20.17 a pe a, heng zinga vbc. 13.68 hi Schemes of NEC (SoNEC) atanga pek niin vbc. 6.50 chu North East Special Infrastructure Development Scheme (NESIDS–Roads) atangin a nih thu sawrkar thuchhuak chuan a tarlang a. SoNEC hian Healthcare, Agriculture, Culture, Scientific Research, Environmental Conservation leh Community Development atan sum hi a pechhuak thin a, Mizoram atanga damlohna avanga Shillong pan thin te tan Patient Lodging and Staff Quarters chu North Eastern Indira Gandhi Regional Institute of Health and Medical Sciences (NEIGRIHMS) bula sak nan a pe a, Central Medical Warehouse, Aizawl sak nan a pe bawk.

Agriculture leh Allied Sectors lam atan NEC hian Kolasib leh Mamit-ah Kuhva huan nei te tan tanpuina a pe a, Fish Farmer Training Centre, Lengpui hmasawnna atana sum a rawn pe bawk a. Mizoram-in a Culture a vawnnun leh tih hmasawnna atan Bethel Veng, Champhai-ah Auditorium sakna tur a pe a, Aizawl Institude of Arts & Music te puihna atan leh Kawlri-ah Cultural Heritage Centre tih hmasawnna tur a tum sak a. Champhai District-ah ram chereu zel tur venna atana hmalakna atan bakah hmeichhia te hriselna leh nu nau pawm te enkawl that pawimawhna inzirtirna leh hriselna kawnga hmasawnna tura hmalakna atan tanpuina a pe bawk. 

NESIDS (Roads), NEC hnuaiah Kolasib, Mamit, Lunglei leh Lawngtlai-a Oil Palm Link Road Km 32.70 a thui thuamthatna tur pek a ni a, heng kawng hi khaw 19-a mipui 60,000 ten an hmang tangkai tur a ngaih a ni a. Kawng hi thlai thar phurhchhuahna nan te, hriselna, zirna leh thlai hralhna kawngah te hmasawnna a pek piah lamah Oil Palm chin kawngah thanna a thlen tura ngaih a ni. May-June, 2026 khan NEC hian Agencies hrang hrang Universities, Technical Institutes, NGO, Society etc hnenah NE hmasawnna tur hian vbc. 18.93 a pechhuak bawk.

Heng bakah hian Mizoram-a Sikpui Ruoi Festival-2025 hmanna te, Mizoram Challenge 2025 hmanna te leh Foundation for Drug-Free Mizoram ten Anti-Drugs Campaign an kalpuina te pawh heng Fund-ah hian a tel a ni.