New Education Policy (NEP) 2020 kalpui tura hmalakna thlirin inrawnkhawmna neih a ni

Mizoram-a New Education Policy (NEP) 2020 kalpui chhoh mek chungchanga hmalak tawhna thlirhona leh inrawnkhawmna chu nimin khan Higher & Technical Education Minister Dr. R. Lalthangliana hovin neih a ni.

Aizawl Vanapa Hall-a he hun hmanna ah hian Dr. R. Lalthangliana chuan a taka NEP 2020 kalpui turin thil pawimawh leh hriatchian tulte a awm avangin kalphung tharte zirna In hrang hranga thawkte'n an hriat bel a tul thu a sawi a. Khawvel changkang zelin thiamna sang zawk ken tel tam tak a neih thu sawiin, thalaite ah thiamna satliah mai nilo, thiamna tak tak leh a taka hman tangkai theih tur chi tuh a ngai tawh a, hemi kawnga tanlak a ttulzia NEP 2020 hian a lantir a ni, a ti a. New Education Policy-in a phut chin mai nilo, kan ramin a mamawh angte nei thei tura theihtawp chhuah turin Academician kalkhawmte chu a chah a ni.

H&TE Minister chuan NEP 2020 tihhlawhtlin nana pawimawh tak State enkawl State University neih a tul thu sawiin, hemi tur hian Sawkar in ngun takin ngaihtuahna a senga, Cabinet Meeting-a sawiho a nih hnuah din a nih theih nana a tul angte bawhzui tura thutlukna siam a nih thu a sawi a. State University dinna tur hian a bika ngaihtuahtu tur Team din a nih thu leh a tul dan anga inrawnkhawmna zau zawk pawh neih tum a nih thu a sawi bawk.

NEP 2020 Implementation Review Meeting-ah hian H&TE Department hotute, College hrang hrang Principal leh Lecturer-te, IQAC Coordinator-te bakah H&TE Board Member-te an tel a. NEP 2020 kalpui chhoh meka hmalak tawh zingah Institution Development Plan College tinte'n an thehlut tawh a. Mandatory Accreditation zawhfel vek tawh niin, Refresher Course leh Training hrang hrang kalpui thin a ni a. Post Graduate Multi Displinary Course College 3 ah kalpui niin thawktu indaihlohna phuhruk nan hmalak a ni a. Skill Enhancement Course kalpui thuai tum niin, NEP 2020 awareness program vawi engemawzah neih a ni tawh bawk.