Larsap hovin Oil seeds, Pulses leh Palm Oil thlirho

Nimin khan Governor hovin Hriak atana sawr chi thlai chi te, Be chi hrang hrang (pulses) leh Oil Palm tharchhuah kawnga Mizoram dinhmun thlirhona neih a ni.

Governor hian nimin khan Raj Bhavan-ah Agriculture Department hotute leh an thawhpui Company - Godrej Agrovet Ltd. leh Patanjali Foods Ltd. Official hotute kawmin he thlirhona hi neih a ni a, he hunah hian Governor chuan National Edible Oil Mission-Oil Palm (NMEO-OP) kalpui mek a nih thu leh Prime Minister in State tin te hriak ei chi bakah Pulses leh Oil Palm tharchhuah kawngah tan la zual tur a hriattir tawh thu a sawi a. India ramin kum khat chhunga hriak ei chi a mamawh zinga za zela 60 lai chu ram dang Indonesia leh Malaysia atangte in sum tam tak sengin a lei thin a. Hetiang bawkin Pulses – Dal, Bekang, Chana leh a dang te pawh ramchhunga tharchhuah kan kham khawp lo hle tih a sawi a. He intodelh tura hmachhawp pawimawh takah hian Mizoram pawhin tih theih a nei a, kan State hian hemi huanga hmalakna ah hian tan a lak nasat a ngai tih a sawi a. He hmalakna huangah hian hma kan sawn phawt chuan kan State sum thawhchhuah a pun bakah kuthnathawktu ten hlawkna an tel dawn a ni, a ti.

Mizoram-ah The Mizoram Oil Palm (Regulation of Production & Processing) Act. 2004 peihfel a nih hnu kum 2005-06 atang khan Oil Palm hi chin tan a ni a. A tira chhut dan chuan Mizoram-ah Oil Palm chin theihna hmun 66,791 Ha (3.16% of geographical area) a awm nia chhutin 26,730 h. a a zauah chin a ni aa. Chhan hrang hrang avangin Oil Palm ching an tlem ta deuh a,tun hnaiah khan zirchianna neih a nih hnuin tunah hian Oil Palm hi District 7-a 3398 Ha. a zau ah chin mek a ni a, khaw 193 ah kuthnathawktu chhungkua 2733 ten Oil Palm huan an enkawl mek a ni.

Tunah hian Oil Palm sawrna hmun hi Bukvannei, Kolasib District-ah Godrej Agrovet Ltd in a enkawl mek a, kum 2014 atang khan chawl lovin Oil Palm hi an la her reng a ni. Patanjali Foods Ltd. aiawhtu chuan Lawngtlai District-a Oil Palm herna tur bun turin Vawiin hian inremna thuthlung ziah a ni dawn tih a sawi bawk.

Hriak atana sawr chi thlai chi chungchanga report pek dan chuan Oilseeds atana hman Antam, Bekang, Chhawhchhi leh a dang te chu 3024 Ha a zauah chin mek a ni a, 3158 MT vel thar chhuah thin a ni. Agriculture Department hotute chuan a hlawm lian deuh a hriak chang thei thlai chi te lakkhawm a nih theih nan Oilseeds chingtute intelkhawmna pawl din a ni tawh a, tunah chuan awmze nei zawkin hmalakpui theih an ni tawh dawn tih an sawi.