Lenkawl

Serchhip District chhung Neihloh khuaa an Branch YMA te chuan an khawtlang-a Lo nei leh hna thawk tha theilo khaichhuahna hun nimin khan an nei a, he hunah hian chhungkaw pakhat, kumin kumtir lama chhungkaw pa ber chesuala hun engemaw chen hna thawk thei lova awm chu YMA bultumin an Lo zawh sawk a ni a, he hun hi bialtu MLA Lalduhoma chuan telpuiin Lo zawhna a tel te ei leh in tur a tum sak bawk a ni. He hunah hian khawtlang mipui thahnem tak an thawkchhuak a ni.

Serchhip District Volleyball Association (SDVA) buatsaih Season Opening Tournament chu nimin tlai khan khelh zawh niin Mipa-ah Keitum Kawn Veng VC chu an champion.

Tun thla ni 10-a Serchhip District Fish Farmer Association General Body Meeting chuan Ser-chhip District chhunga Sangha Dil ten misual kut a tuar ta fo mai chu pawi an tih thu leh heng an Sangha Dil te a lo him zawk nan a khawihtu misual man chhuah te dan anga a na thei ang bera hrem an phut thu Resolution siamin an pass a. Phai lam atanga Sangha chawkluh ngai lova, Sangha hrisel leh thianghlim Serchhip District in kan intodelh theih nan theihtawpa hmalak zel n tum tlat thu pawh an Resolution-ah hian an tarlang bawk a ni.

Thla thar October 4 atanga ni 9 chhunga India Sipai lak runpui Rajiv Gandhi Stadium, Mualpui-a neih turah Serchhip District atanga diltute tan a thlawnin Physical Test Preparation Camp buatsaih sak an ni dawn tih Serchhip SP Stephen Lalrinawma chuan a sawi a. Serchhip District chhung mi, Sipai tan tuma dilna thehluttu zawng zawngte tan ngaihven theih a ni a, he Free Camp a tel duhte tan September 19, 2022 chawhma dar 10:00-ah SP Office, Serchhip-ah in report tur niin a tuk September 20, 2022 atangin Camp hi neih tur a ni ang. Hriatchian leh zawh duh neite tan In-Charge Officer, SI Lalzidinga Kawlni (Phone No. 9863882429/9366224672)-ah te zawhfiah theih a ni bawk ang.

Tun thla September, 2022 atanga December, 2022 chhung hian District Agriculture Census neih tur a ni a. Khaw tinah chumi hna lo thawk thei tur mi, HSSLC Pass chin, hna thawh dang nei lo mamawh a ni a, a dil duh chuan September 15, 2022 ralhmain Plain Paper-ah dilna ziakin District Research Office, Serchhip-ah thehluh tur a ni ang. Lehkha-a dilna thehlut hman lo tan pawh Whatsapp hmangin Phone No. 7085529098 leh 9436130739-ah thehluh theih a ni bawk a, Hming, Pa hming, Address, HSSLC Certificate/Marksheet Xerox Copy attested leh Whatsapp hmanna Mobile No. te tarlan tur a ni. Survey hi Mobile Application hmanga thawh tur a ni dawn a, khaw pakhatah lawmman Rs. 2300/- pek an ni ang.

Nimin tlai thleng khan Serchhip District-ah COVID-19 hri kai enkawllai mi 25 an la awm.

MNF Legislature Party Secretary leh MNF Adviser ni bawk L. Thangmawia chuan Congress Party chu zep then neia mipui hnena thu dik kimchang lo puangah puhin, “That loh theih lohna bawm zuartute hian Mizo mipuite hnenah zep then tam tak neiin mipui bumna bawm an rawn hung chhuak a ni,” a ti.

Niminpiah khan Mizoram-ah COVID-19 hri kai hmuh tlem leh hretin nimin tlai thlengin hri kai enkawllai pawh 238 an la awm.

MNF Thalai, Mizo National Youth Front (MNYF) chuan tun thla ni 20-a Martar Day lo thleng tur pualin nimin khan Aizawl Mizo Hnam Run-ah a thlawna thisen pekna hun an buatsaih a, mipa 48 leh hmeichhia 5, an vaiin mi 53 ten thisen an pe a ni. Nimin-a thisen pekna hun an buatsaih hi MNF General Hqrs. Treasurer K. Vanlalauva chuan hmanpuiin National Council-in an ngaihtuah hnuah Martar Day hi September 20, 1980-ah Arakan-ah intanin hman hmasak ber a ni tih a sawi a. “Ramhnuai a kan awm lai khan nakinah zalenna kan neih theih takin Ram leh hnam tana nunna chan tam tak an awm si a, anni hriat reng nan September ni 20 hi an lo ruat ta a ni. September ni 20 hi MNF tan nî pawimawh tak a la nireng dawn a ni” a ti bawk.

PC Party chuan nimin khan Assembly Speaker leh Deputy Speaker te hnenah MLA Pension kal-phung siamtha tura ngenna ziakin an thehlut a, he an lehkha thehluh ah hian MLA Pension atan hian sum kan hmang hnem ta hle tih tarlangin, tuna kan kalphung anga kan kal chuan MLA Term thar a awm apiangin sum kan seng tam tial tial bawk tih an tarlang a. Hei vang hian MLA ni tawh te MLA an nih loh laia pension pek char char kalphung hi titawpa sawrkar hnathawk pension kum mil hian pension kum siama pension kum a thlen hnu chauha pension pek tawh tur leh MLA tling ngun apiang pension pek tam chu titawpa a inzat veka pension pek tawhna Dan thar siam turin an ngen a ni. Tunah hian Mizoram-ah MLA pension la mi 97 awmin thla khata pension an lak zat hi Rs. 50,46,666 niin kum khatah Rs. 6,05,59,992 a ni bawk.

Mizoram State Planning Board Vice Chairman H. Rammawi chuan niminpiah tlai khan sawrkar laipui External Affairs Ministry-a Joint Secretary Smita Pant chu hmuin tuna Mizoram a Myanmar Refugee awm te chu Myanmar ram a an let leha an security leh an resettlement programme Myanmar sawrkarin fel taka a duan loh chuan Mizoram sawrkar in Myanmar ramah thawnlet a tum lo tih a hrilh.

India ram State Cooperative Banks hrang hrangte inthlunzawmna pawl, National Federation of State Cooperative Banks Ltd (NAFSCOB) chuan nimin khan Aijal Club-ah Annual General Meeting neiin I&PR Minister Lalruatkima chuan a hmanpui a, Mizoram Cooperative Apex Bank kaltlanga Mizoram mipuiin malsawmna an dawn theihna bul pawimawh tak pawh NAFSCOB hmalakna vang a ni tih sawiin, NAFSCOB te hmalakna hrang hrang a tarlang bawk a ni. Tun tuma NAFSCOB Meeting-ah hian India ram State Cooperative Bank hrang hrang atangin palai 40 an rawn kal a, hmalakna an neih mekte bawhzui dan tur leh Cooperative Bank leh Short Term Cooperative Structure tihchakna tura hmalak dan tur chi hrang hrang an rel a ni.

Mizoram-a rawn zin Sawrkar Laipui a Minister of State for Consumer Affairs, Food & Public Distribution and Rural Development Sadhvi Niranjan Jyoti- leh Mizoram Larsap Dr. Haribabu Kambhampati te chu nizan hmasa khan Larsap chenna Raj Bhavan a an inkawm a. He hunah hian Larsap chuan Minister hi Mizoram chanchin tlangpui te, thingtlang dinhmun leh hmasawnna a thlen dan te, Ration lakna Free Price Shop mipui in an tangkaipui dante a hrilh a. Sadhvi Niranjan Jyoti-i chuan Mizoram chu ram pahnih in an karcheh avangin NE State ah chuan a pawimawh hle nia a hriat thu te sawiin, Mizoram hmasawnna turin theihtawp a chhuah tur thu Larsap a hrilh a ni.

Union Minister of State for Consumer Affairs, Food & Public Distribution and Rural Development Sadhvi Niranjan Jyoti chuan nizan hmasa khan Aizawl-a Hotel Floria ah Rural Development, FCS&CA leh PWD te chu a Ministry enkawl kaltlanga Scheme leh Project hrang hrang thawh mek te dinhmun thlirletna hun a neihpui.

Mizoram-a cham mek Union Minister of State, Rural Development, Consumer Affairs, Food & Public Distribution Sadhvi Niranjan Jyoti-i chuan nimin khan Mamit a tlawh.

Agriculture Minister C. Lalrinsanga chuan nimin khan ‘Outlook Agri Tech Summit and Swaraj Awards’ ah Mizoram sawrkar aiawhin ‘Best Performing State in Agriculture among the North East States’ chawimawina a dawng a, he chawimawina hi Union Agriculture Minister Narendra Singh Tomar chuan a hlan a ni.

August ni 31, 2022 thleng khan Mizoram-ah lirthei 3,19,033 a awm a, chung zinga lirthei 64,962 chu lirthei document fello niin hei hi lirthei awm zat atanga chhutin za zela 20.36% a ni.

Serchhip bialtu MLA Lalduhoma chuan kan ram tichhetu ber chu eirukna a ni tih sawiin, “Zoram siamthatna bul chu chhungkua ah a innghat a ni,” a ti a. “Thianghlim tak eizawng turin Zoram-a nu leh pa zawng zawng hian kan tu leh fa te zirtir theuh ila a sawt khawp ang,” a ti bawk.

Serchhip Police te chuan thil sual titute hria emaw, hmu emaw chuan thuneitute hnena hrilh hi kan mawhphurhna a ni tih sawiin, ruihhlo zuar hriate chuan rang taka Police emaw, Excise hrilh hre thin turin an ngen bawk.

Serchhip District atanga Dragon Fruit thar-chhhuah chu a vawi khatna atana State pawna thawnchhuah turin nimin khan Serchhip DHO Office atangin vailiam a ni.