Kan ram tichhetu ber chu eirukna a ni, a siamthatna bul chu chhungkua ah a innghat - Lalduhoma

Serchhip bialtu MLA Lalduhoma chuan kan ram tichhetu ber chu eirukna a ni tih sawiin, “Zoram siamthatna bul chu chhungkua ah a innghat a ni,” a ti a. “Thianghlim tak eizawng turin Zoram-a nu leh pa zawng zawng hian kan tu leh fa te zirtir theuh ila a sawt khawp ang,” a ti bawk.

Mizoram Upa Pawl (MUP) District Hqrs. Serchhip in MLA Fund cheng nuai 5 an hmuh hmanga Serchhip Bazar-a MUP Building an chei that lawmna puala inkhawm nimin-a Serchhip Sub-Hqrs. YMA Conference Hall-a an buatsaih a hmanpuina ah he thu hi sawiin Serchhip bialtu MLA Lalduhoma chuan kan ram dinhmun thlirin kan ram siamthat theih tawh loh leh siamthat phak a nih ring tawh miah lo mi tam tak an awm thu leh ram tam tak tluchhia an lo awm tawh thin mah se an tungding leh thin a ni tih Bible-ah pawh hmuh theih a nih thu a sawi a, “A tir atanga dik tak inrelbawl thei ram leh hnam hi khawvel ah an awm bik lo a ni,” a ti a. Tunlai khawvel-ah pawh ram dinhmun tluchhia tawh hnu tundina a awm leh thin a awm thu sawiin, “Vawiin-ah hian kan ram, kan hnam hi kan duh ang a ni lo a nih pawhin heti reng a awm tur hian kan in ngai tur a ni lo, siamthat theih kan ni,” a ti a. Tlawmngai pawl tha tak tak, Kohhran tha tak tak leh Pathian ringtu tha tak tak kan la neih avangin Pathian thil tih theihna nen chuan kan ram hi siamthat hi a har mawlh lo a ni, a ti bawk.

Serchhip bialtu MLA chuan kan ram ah pa ber emaw, nu ber emaw Sakhaw ngaihsak miah lo leh chhungkaw Maicham siam ngai miah lo kan tam tawh avang leh a siam zingah pawh a mawi-ah lemchang titiha siam kan tam tawh avangin chhungkua a chhia niin a sawi a, Zoram siamthatna bul chu chhungkua ah a innghat tih sawiin, “Chhungkaw tha din ila Kohhran tha a ding ang, NGO tha a ding ang, Sawrkar tha a ding ang,” a ti a. Kan ram tichhetu ber chu eirukna a ni tih sawiin, eirukna laka kan fate an fihlim theihna tura thianghlim tak eizawng turin Zoram-a nu leh pa zawng zawng hian kan tu leh fa te zirtir theuh ila a sawt khawp ang, a ti a. Thinghlim taka ei kan zawna a ram leh a felna kan zawn hmasak chuan Pathian in lei hausakna min pek belh dawn tih sawiin, hetiang tur hian mahni chhungkua ah theuh bul tan turin he huna kalkhawmte chu a chah bawk.

MUP District Hqrs. Serchhip Office  thar lawmna hun hi an President CL. Ramngaia chuan kaihruaiin MUP Serchhip District-a Treasurer T. Lalrawngbawla chuan bialtu MLA in MLA Fund cheng nuai 5 a pek hmanga hma an lak dan te a sawi a. MUP Building an luah mek hi sawrkar Department ram a nih thu leh kum 5 chhung zel atana inhawh sak tura inremna an siam thu sawiin, a tira building zauh leh cheithatna tura an rua-hman chu a ram neitu lamin rem an tih loh avangin bialtu MLA in a phalsak angin building chei-thatna atan te an hman tak thu a sawi a. Building an cheithat bakah hian bungrua an mamawh Thutthleng, Dawhkan leh bungraw dang te pawh an lei nghal thu a sawi bawk.