Lenkawl

Serchhip Town Joint VC Association hruaitute chuan Serchhip District Hospital-a damlo awmpuitu leh damlo kan/tlawh chungchang ah a hma anga kalpui leh tawh an duh thu Serchhip District Medical Superintendent hnenah ziakin an thlen.

Ministry of Defence bultumin Mizoram-a Journalist 12 te chuan Vawiin atang hian hmarchhak State thenkhat ah Study Tour an nei dawn a, MJA Serchhip District aiawhin Kapliana Pachuau a kal dawn a ni.

Thenzawl Zone Football Association (TZFA) buatsaih ‘Season Opening-cum-Branch YMA (Womens) Football Tournament’ chu nimin khan Thenzawl Lothazawl Football Ground-ah khelh tan a ni a, he Tournament hi MFA Sr. Vice President PC. Vanlalhruaia chuan hawngin TZFA President Liantluanga Renthlei chuan kumin chhungin TZFA ten Football Tournament tum 4 an buatsaih tawh thu leh October thla ah lawmman cheng nuai khat awmna MLA Cup buatsaih leh an tum thu a sawi bawk. He Tournament-ah hian Thenzawl leh a chhehvel atangin Club 14 an tel a, Hmeichhe inelna ah YMA Branch 10 telin tun thla ni 22 khian Final khela zawh hman tum a ni ang.

Serchhip District Volleyball Association in a buatsaih Season Opening Tournament chu Vawiin hian Semi Final khelh a ni dawn a, Hmeichhia ah Bungtlang VC leh Keitum Kawn Veng VC te intumin Vengchung VC leh Dinthar VC an intum ang. Veteran-ah B. Manliani Team leh Bungtlang Team intumin Grace Pharmacy & VTS Team leh Chhim Veng VC an intum anga. Mipa inelna ah Hriangtlang VC leh New Serchhip VC te intumin Keitum Kawn Veng VC leh Darnam VC te an intum ve bawk ang.

Mizoram sawrkar in ruahmanna a siam angin nimin atang khan Serchhip District Treasury chuan sawrkar hnathawk Group A leh B te August thla hlawh chu an pechhuak ve leh ta a, hemi hmalam hian a nghet lo a thawk leh Group C leh D te chu an hlawh pekchhuah a lo ni tawh bawk a ni. Hetihlai hian Sawrkar Bill dang erawh pekchhuah a la ni lo thung.

Nimin khan Serchhip District-ah COVID-19 hri kai chhinchhiah thar mi 16 lai awm lehin hri kai enkawllai pawh mi 27 lai an awm leh tawh bawk.

New Delhi-a cham mek Higher & Technical Education Minister Dr. R.Lalthangliana chuan nimin khan Union Minister of State for Education Dr. Rajkumar Ranjan Singh chu hmuin Lunglei-a Mizoram University Southern Campus din tur chungchang a sawipui.

Hmeichhe naupangte mahni-a inven dan zirtirna tur, Rani Laxmibai Atma Raksha Prashishan (Rani Laxmibai Self Defence Scheme) atan nimin khan Samagra Shiksha leh Mizoram Amateur Taekwondo Association(MATA) te chuan thawhhona thuthlung an ziak.

Law & Judicial Minister TJ. Lalnuntluanga chuan niminpiah khan Guwahati-ah Bar Council of Assam, Nagaland, Mizoram, Arunachal Pradesh leh Sikkim Diamond Jubilee a hmanpui a, Minister chuan Ukil te chu Sawrkar hnathawk anga thla bi hlawh la an nih ve loh avangin an tan ‘Corpus Fund’ siam a tul thu leh hemi kawnga ngaihtuahna sen a hun tawh thu a sawi a. PIL hman dan ah Ukil te an pawimawh thu sawiin, dik lo taka mimal beih nana hman a awm tam telh telh ni a lang chuan ram nuam lo leh hrehawm taka min hruailuh theih hial te pawh a hlauhthawnawm thu leh PIL-ah hian Ukil te hi Dan lama mi rawn tur an nih angin, kan ram hi ralmuang leh chen nuam a nih zel nan Public Interest leh Private Interest te thliar hranga, mipui te kawng dika kan hruai a ngai a ni, a ti bawk.

Nimin khan Mamit-ah Aspirational Programme hnuaia Campaign, Buniyadi Shiksha Abhiyan hawnna neih a ni a, he programme hnuaiah hian zirlai naupang pawl 1-5 ah hmalakna kalpui tum niin, naupangte'n thiamna tak tak an neih theih nan leh an zirlai bakah nun-phung pangngai tak an neih nan hmalak tum a ni a, Mamit District chhunga Block pali atangin Sawrkar School 34 thlanchhuah niin, naupang 2734 tuam tum niin Phase 3-ah hmalakna hi kalpui a ni dawn a ni.

Nimin khan Kolasib Town Planning and Development Committee chu an Chairman leh bialtu MLA K. Lalrinliana hovin Kolasib DC Conference Hall-ah an thukhawm a, he hunah hian Kolasib Town Planning Area (Boundary) tur a ruahman tawh chu a hma aia huamzau zawk tura rel a ni a. Kolasib khawpui chhunga inkalpawhna hrang hrang thawmthat hna thawh dan ngaihthlak niin khawpui chhung Veng tin ah lirthei hunna tur bik ruahman a nih theih nana hmalak dan tur leh Thlanmual intawm felfai taka siam a nih theih nana hmalak dan turte sawiho a ni.

Nimin khan Sub-Committee on Draft Mizo-ram River Protection Bill chu Agriculture Minister C.Lalrinsanga hovin a Pisa-ah an thukhawm a, Agriculture Minister chuan Mizoram chhunga lui leh luidung humhalh chu thil tih makmawh leh tun dinhmuna thil tul tak a ni tih sawiin, sawrkar chuan theihtawp chhuahin Draft Bill buatsaih nan ngaihtuahna hrang hrang a vawmkhawm mek a ni, a ti a. Irrigation and Water Resources Department kaltlangin National Hydrological Project hnuaiah Mizoram chhunga lui hrang hrang tui kan neih tam dan volume leh a luan chak dan te teh leh record mek a nih thu tarlangin, Data Collect na Centre pawh Aizawl leh Lunglei-ah a awm thu a sawi a. Heng data en hian leichhunga tui in recharge zat a hriattheih vek a, chungte ngaihtuah chuan kan ram lui humhalh hi a tul tak zet a ni, a ti.

Mizoram-ah COVID-19 hri kai enkawllai zat tlahniam ve leh hretin nimin tlai thlengin hri kai enkawllai mi 230 an awm.

Peoples' Conference Party Acting President Vanlalruata chuan Mizoram in leiba kan neih theih zat bituk aia tam kan ba tawh niin a sawi.

Nimin khan Aizawl Vanapa Hall-ah ‘Zuk leh hmuam laka zirlaite venhim’ tih thupui-a hmangin Mizoram State Anti-Tobacco Day 2022 chu hman a ni.

ZPM Leader Lalduhoma chuan The Mizoram (Land Revenue) (Amendment) Bill, 2022 chu ‘Mipui chanvo atanga chanai neih ve tumna dan’ niin a sawi.

Serchhip District Volleyball Association (SDVA) buatsaih ‘Season Opening Tournament’ khelh mek chu a hmawr an bawk dawn hnai ta.

Serchhip District Fish Farmer Association (SDFFA) chuan Inrinni khan Serchhip Press Club-ah kum 2022-2024 chhunga an hruaitu tur thlanna an nei a, he hun hi Serchhip District Fisheries Development Officer Lucy Lalrinpuii chuan hmanpuiin Sangha khawia eizawngtute fuihna thu a sawi bawk. He hunah hian SDFFA President atan Hmangaihthanga (Vengchung); Vice President-ah R. Lalmuansanga (Thenzawl); Secretary-ah HL. Muanthanga (AOC Veng); Asst. Secretary-ah F. Lalrindika (Thenzawl); Treasurer-ah LR. Bawlliana (Bazar Veng) leh Fin. Secretary-ah K. Laldaihvela (Bazar Veng) te thlan an ni.

Serchhip District-ah Inrinni leh nimin-ah COVID-19 hri kai thar leh enkawl dam chhinchhiah thar an awm lova, nimin tlai thlenga Serchhip District-a COVID-19 hri kai hmuh tawh zat chu 14,526 niin an zinga 14,473 chu enkawl dam an ni tawh a, hri kai hmuh atanga za zela 99.63 te enkawl dam ni tawhin hri kai enkawllai 17 an awm mek a ni. Serchhip District-ah COVID-19 hri kai enkawllai mi 17 zinga 10 te hi Khawlailung khua niin Thenzawl-ah 3, East Lungdar-ah 2 leh Lungchhuan leh Vanchengte-ah mi pakhat ve ve te an ni.

Presbyterian Kohhran chuan nimin Pathianni hmang khan Pastor Bial hrang hrang ah Naupang Sunday School Bial Inkhawmpui an nei.