That loh theih lohna bawm zuartu ten Bumna bawm an rawn hung chhuak - L. Thangmawia

MNF Legislature Party Secretary leh MNF Adviser ni bawk L. Thangmawia chuan Congress Party chu zep then neia mipui hnena thu dik kimchang lo puangah puhin, “That loh theih lohna bawm zuartute hian Mizo mipuite hnenah zep then tam tak neiin mipui bumna bawm an rawn hung chhuak a ni,” a ti.

Nimin-a Aizawl Press Club-a thuthar thehdarhtute a kawmna ah L.Thangmawia chuan tun thla ni 10-a MPCC Media Department in chanchinbumite an kawmnah ni 1.4.2019 atanga ni 14.7.2022 inkar chhunga Mizoram Treasury 9-a Contractor-te Bill cheng nuai 100 chunglam chin an pekchhuah dan RTI hmanga an dil an tarlang ah Treasury te Bill pekchhuah 736 zingah Bill 103 chauh thlang chhuakin, sawrkar chu Contractor duhsak bik nei anga lantir an tum niin a sawi a. MPCC in Contractor zingah duhsak bik a nei nia an sawi chu sawifiahin, “Bill thehluh ni la laa pass nghal 105 an awm laiin MPCC te hian 10 vel chauh an sawichhuak a. An tarlan ve loh Bill dang 90 chuang hi duhsak bik an ni ve lo em ni tih hi kan zawhna a ni,” a ti a. “MPCC ten MNF sawrkar duhsak an tih contractor te Bill zawng zawng belhkhawm hi Rs 65,82,21,651 nia an sawi laiin sawi kim duh loh contractor dang te Bill belhkhawm Rs 33,31,69,63,074 a ni daih a. Bill chhuak zawng zawng atanga MPCC unaute rawn tarlan bik Contractor 6 te chan zat chu 1.93% chauh a ni a, an sawilan tel loh Contractor dang te chan 98.06% hi eng vanga zep nge an nih tih hi kan zawhna a ni,” a ti bawk.

MNF in Contractor duhsak bik 6 a nei nia sawi chu a dik lo a ni tih L.Thangmawia chuan sawiin, “Bill pass zingah hian Congress party a nihna sang tak nei te pawh an awm a, mahse hei hi sawi duh lovin MPCC te hian hre reng chungin mipui rilru hruaikawi an tum a ni,” a ti bawk a. Heng bakah hian PMGSY hnuaiah pawh kum 2020-21, 2021-22 leh 2022-23 chhungin Contractor te bill 35, a vaiin Rs. 4,73,43,21,500/- chu pekchhuah a ni tih sawiin, heng zingah pawh hian a ni la la a pekchhuah nghal leh ni khat hnua pekchhuah te pawh a awm thu a sawi bawk a, Mizoram sawrkar chuan hmasawnna hnathawktute hnenah a remchan dan ang leh sum awmdan ang zelin rualkhai takin bill te hi a pe chhuak zel thin zawk tih a sawi bawk.