Serchhip Police ten ruihhlo zuar hria te thuneitute hnena hrilh hre vat thin turin mipuite an ngen
Tunlaia sualna chi hrang hrang leh Dan bawhchhiatna thleng thei chungchangah Serchhip Sub-Divisional Police Officer (SDPO) Kaste Romalsawma chuan hriattirna tichhuakin Serchhip District chhungah ruihhlo, a bikin No. 4 a tam thu leh rukrukna a ti hluar hle tih a tarlang a. Chuvangin ruihhlo zuar hriate chuan rang taka Police emaw, Excise emaw hrilh hre thin tura ngenin, an hming leh nihna thup sak a tul pawhin an thup sak dawn tih a tarlang a. Rukruk leh midang kutthlak tum report nachang kan hre thin chu a lawmawm tih tarlangin, “Chutih laiin mi thil ruk sa man tlawm zawka lo lei sak erawh kan tim lo viau si niin a lang. Ruk a ni tih ringhlel chunga mi thilruk lo lei sak hi dan kalh a ni a, lungin tan leh pawisa chawi theihna a ni,” a ti a. Hetianga misual thil ruk lo lei saktute hian Police hnenah ‘thil ruk a ni tih ka hre lova’ tiin phat mar tum leh thin mah se, a tam ber chuan an rilruin thilruk an lei a ni tih an hre sa tho thin niin a tarlang a. “Chuvangin Police lam chuan hetiang chhuanlam hi pawm sak tawh lova mi thil ruk lo lei saktute hi Court lama thawn zel tha berin a hre tawh a ni,” a ti bawk.
Serchhip SDPO thuchhuah chuan Gas bur te, Tui meter te, Silai te leh thil dang, Company emaw, sawrkar thu lova lei leh hralh thiang lo bungrua a awm tih chu mitin hriat saa ngaih a nih thu leh chutiang lo leitute chuan dan an pawisa lova, a titute chu man nghal zel an ni ang tih tarlangin, Ruihtheih thil tih chingten bungrua a man pangngai aia tlawm lutuka an zawrh lo leitute pawh thil ruk an lo lei a nih chuan an thil lei chhuhsak bakah anmahni pawh man nghal zel an ni ang, tih a tarlang a, hei hian huan thlai rah te, Dil Sangha te leh Lo lam atanga tharchhuah thilte pawh a huam vek tih a tarlang a. Cr.PC Section 39-na chuan ‘Mi tupawhin thilsual tih tumte, thil sual titute a hria a nih chuan thuneitute hnenah a hrilh ngei tur a ni,’ tia a sawi thu pawh tarlangin, “Chuvang chuan thil sual titute hria emaw, hmu emaw chuan thuneitute hnena hrilh hi kan mawhphurhna a ni. Police te i hrilh hian Police te i pui a ni mai lova, nangmah leh khawtlang tan thil tha i thlen zawk a ni,” a ti bawk.
Sawrkarin lirthei neitute leh khalhtute zawm tur Dan khauh zawk a hman tak avangin a bawhchhetute lei chawi theih hniam ber pawh Rs. 500 a lo nih tak thu leh Rs. 1000, Rs. 2000, Rs. 5000 chawi theihna te, Rs. 10000 leh a chunglam chawi theihna te a awm tawh thu pawh thuchhuah ah hian tarlangin, “He dan thar hmang hian Police Department chuan Mobile Checking a khat tawkin a nei thin dawn a. Mipuite tha taka dan zawm turin kan inhriattir a ni,” a ti bawk.
Comments
Post a Comment