Serchhip-a Dragon Fruit thar State pawn-ah thawn
Tun tuma Dragon Fruit thawnchhuah te hi Serchhip Dinthar Veng a cheng Vanlaluaia te tharchhuah niin Shillong a zawrh tura ruahman a ni a, tun tumah hian quintal 2 thawnchhuah niin hei hi Serchhip atanga Dragon Fruit tharchhuah an Department kaltlanga State pawn-a thawn hmasak ber tur a ni tih Horticulture Department hotute chuan sawiin, Serchhip District Horticulture Officer R. Lalrintluanga chuan Serchhip Chanmari Veng-a DHO Office tual atangin a vailiam a ni. Serchhip DHO chuan heng Dragon Fruit te hi an Department Motor hmangin Aizawl thleng phurh a ni phawt dawn tih LENKAWL hrilhin, heta tang hian Motor hran hmangin Shillong hi panpui leh a nih dawn thu a sawi a ni.
Horticulture Department hian kum 2012 atang khan Dragon Fruit hi kuthnathawktute an chintir tan a, Serchhip District-ah chuan kum 2015 atanga chingin District pumah kuthnathawktu thlanbik hnenah Unit 490 chintir an ni tawh a. Nikum 2021 chhung khan Serchhip District atang hian quintal 200 vel tharchhuah niin kumin 2022 hian quintal 500 vel tharchhuah beisei a ni bawk. Serchhip District-ah hian Dragon Fruit hi chi thum (3) chin a ni a, heng te hi a Sen, a Var leh a Eng te niin tunah hian a Sen leh a Var chi hi tharchhuah mek a ni a, Dragon Fruit hi thei dang anglo takin uluk taka enkawl chuan kum khatah vawi nga lai a thar thei a ni.
Tun tuma Dragon Fruit thawnchhuah tak thartu Vanlaluaia hi Horticulture Department in kumin a Serchhip District-a ‘Best Farmer Award 2022’ an buatsaih dawngtu kha a ni a, New Serchhip Kikawn bulah Dragon Fruit huan hi neiin ban 1000 phunin Dragon Fruit kung 3000 vel an phun tawh a ni.
Comments
Post a Comment