‘Ride to Clean Air’ thupui hmanga Thirsakawr-a India ram fangtu chawimawina hun hman a ni

Boruak thianghlim pawimawhzia midang zirtir nana Thirsakawr hmanga India ram State zawng zawng leh Union Territory (UT) 5 fangchhuaktu Vanlallawmzuala Varte, Mission Veng Aizawl chu nimin khan Mizoram Pollution Control Board (MPCB) buatsaihin chawimawi a ni.

Vanlallawmzuala Varte (Lza Varte) hian kumin January 25 khan Aizawl chhuahsanin, boruak thianghlim pawimawhzia rampuma tlangau turin ‘Ride to clean air’ kalpui hian Thirsakawr hmangin India ram State hrang hrang a fang tan a, ni 284 chhungin India ram State 28 leh UT 5 a tlawhchhuak a, Thirsakawr hmang hian Kilometre 17,043.10 a tlan a, chawhrualin nitin darkar 10.29 inkhalhin km 83.54 a inkhalh a, nimin khan Aizawl rawn lutin ropui taka lo lawm a ni.

Mizoram Pollution Control Board (MPCB) Secretary C. Lalduhawma kaihhruaia amah lo lawmna hun MC Hall, Durtlang-a neih ah hian Lza chuan a zinna chungchang sawiin, a tir atanga India ram hmun hrang hranga a kalna ah Missionary te a belh tlat thu leh hei hian kawng tam taka harsatna a tawh na tur lakah pawh a puih thu a sawi a, hmun hrang hrangah sawrkar laipui hnuaia thawkten an puih nasat thu a sawi bawk a, Umling La, Ladakh-a tlang sang hmun a thlenin harsatna engemaw a tawh thu bakah, Rajasthan thlaler-a thli lum tleh te chu hun harsa lai a nih thu a sawi a, Mizoram Pollution Control Board bakah State hrang hranga Pollution Control Board leh media te lo buaipuina ah a lawm tih a sawi bawk a ni.

He hunah hian MiCA President Franklin Lalrinngheta pawhin Vanlallawmzuala Varte tumruhna leh thahnemngaihna fakawm a tih thu sawiin, a thupui ken,’Ride to Clean Air’ chuan a tak a awmze thui tak a neih ngei a beisei thu a sawi bawk a ni.

Durtlang-a Vanlallawmzuala Varte hmuahna hmun ah hian Mizoram Pollution Control Board hotute, Mizoram Cycling Association member-te leh Durtlang Leitan leh Mission Veng Branch YMA member thahnem tak an tel a. He hun hman zawh hnu nimin tlai khan MiCA kaihruaiin Cyclists engemaw zat nen Durtlang Leitan atang hian Mission Veng panpui niin Mission Veng-ah hian nizan khan amah lo lawmna hun hi buatsaih leh a ni bawk.