Mipui ten Online hmanga Revenue Department an dawr theihna tur Portal thar CM in a hawng

Mipuiten Land Revenue & Settlement department te awlsam taka an dawr theihna tur online service portal, e-ram ti a vuah, Development of Comprehensive & Integrated GIS based System for Maintenance and Management of Land Records in Mizoram portal chu nimin khan Chief Minister Lalduhomna chuan a hawng.

Irrigation & Water Resources Auditoriumm Aizawl-a he Portal thar hawnna hunah hian Chief Minister Lalduhoma chuan sawrkar leh mipuite inkara indawrna awlsam zawk, hun leh tha heh lo zawk, rang zawk leh huapzo zawk neih an duh tih sawiin, “Chu chu kalphung thar, mipui sawrkar zia a ni,” a ti a. “Sawrkarna kan chelh niin Right to Public Services Act chu tha zawka kalpui tur leh chumi kaltlanga service tam zawk pe turin kan intiam a. Ni za chhungin kan tihlawhtling a. Mipuiten an lungawi lohna an thlen zung zungna tur Public Grievances & Redressal portal changkang tak - Mipui Aw thar pawh kan hawng bawk. Hun a lokal leh deuhva, Sustainable Development Goals Dashboard leh Project Monitoring Committee Dashboard kan hawng leh a. Vawiin ah mipuite dawr nasat em em Revenue hmalakna tichaka tiawlsamtu tur e-ram kan hawng leh ta a ni,” a ti bawk.

Chief Minister chuan, “Revenue Minister tha tak kan neih zarah hun reilote chhungin hmasawnna sawi tur kan nei nual mai,” tiin “Tunhmaa House Pass dil apiangten Revenue Minister dawhkan a paltlang ngai thin kha tihtawp a ni a. Aizawl District Settlement Office chu mipuite mamawhna avangin Aizawl North leh Aizawl South-ah then a ni dawn a, Revenue thubuai tam takte rang zawka ngaihtuahtu tur Revenue Court kan siam dawn a, Surveyor indaihlohna avanga kan harsatna sutkian nan Empanel Survey Firms System kan kalpui dawn. Hengte hi Notification tihchhuah vek tawh an ni,” a ti a. Nimin-a an hawn Computerisation of Land records chu kan mamawh avanga a lo tlangpui thin thu pawh sawiin, “Kan sawrkar veleh chak takin hma kan la nghal a, hun reilote chhungin kan lo hawng thei ta. Vawiin-ah hian kan ram chuan pen khat dangin hma kan sawn a ni,” a ti a, e-ram a puitlin theih nana thawktute zawng zawng chungah lawmthu a sawi bawk a ni.

Nimin-a hawn tak e-ram portal hi Ministry of DoNER, Science & Technology Section Fund cheng vbc. 6.4 atanga thawh niin, a bul tan nan Pilot Project angin Aizawl District hnuaia Land Records leh process te kalpui phawt a ni anga. In hmun dilna, Periodical Patta, Land Lease, House Site leh hming thlak te a bul tan a ni anga. A tahtawlin Revenue Department Service 27 te chu he Portal-ah hian bilh tel vek tura ruahman a ni. A portal address chu eram.mizoram.gov.in niin a hmang thiam lo te tan Common Service Centre (CSC) kaltlanga hman theih a ni.

He hun hi Land Revenue & Settlement changtu Secretary Vanlalmawia chuan kaihruaiin Revenue Minister B. Lalchhanzova pawhin he hmalakna hi Ministry hmasain bul a lo tan tawh a nih thu sawiin, “Kan theih ang angin kan umzui a, siam that chhoh zel ngai tam tak a la awm ang tih hre chungin kan hawng ta phawt a ni,” a ti bawk.